ರಾಜಸ್ಥಾನ ವಿಧಾನಸಭಾ ಚುನಾವಣೆ: ಸಾವಿರಾರು ಮದುವೆಗಳ ಕಾರಣಕ್ಕಾಗಿ ಮತದಾನದ ದಿನಾಂಕವೇ ಬದಲು!

ಅಕ್ಟೋಬರ್​ 9ರಂದು ಕೇಂದ್ರ ಚುನಾವಣಾ ಆಯೋಗದ ಮುಖ್ಯ ಆಯುಕ್ತ ರಾಜೀವ್ ಕುಮಾರ್, ರಾಜಸ್ಥಾನ, ಮಧ್ಯಪ್ರದೇಶ, ಛತ್ತೀಸ್​ಗಢ, ಮಿಜೋರಾಂ ಹಾಗೂ ತೆಲಂಗಾಣ ಸೇರಿ ಐದು ರಾಜ್ಯಗಳ ವಿಧಾನಸಭಾ ಚುನಾವಣೆಗೆ ದಿನಾಂಕ ಪ್ರಕಟಿಸಿದ್ದರು. 200 ಸದಸ್ಯ ಬಲದ ರಾಜಸ್ಥಾನ ವಿಧಾನಸಭೆಗೆ ನೆವೆಂಬರ್​ 23ರಂದು ಮತದಾನ ನಡೆಯಲಿದೆ ಎಂದು ಪ್ರಕಟಿಸಿದ್ದರು.

ದಿನಾಂಕ ಬದಲಿಗೆ ವಿವರಣೆ ಹೀಗಿದೆ…: ”ಭಾರತೀಯ ಚುನಾವಣಾ ಆಯೋಗವು ಅ.9ರಂದು ಇತರ ರಾಜ್ಯಗಳ ಚುನಾವಣೆಯೊಂದಿಗೆ ರಾಜಸ್ಥಾನದ ಸಾರ್ವತ್ರಿಕ ಚುನಾವಣೆಗೆ ಮತದಾನವನ್ನು ನೆವೆಂಬರ್​ 23ರ ಗುರುವಾರ ನಿಗದಿ ಮಾಡಿತ್ತು. ತರುವಾಯ ಆಯೋಗವು ವಿವಿಧ ರಾಜಕೀಯ ಪಕ್ಷಗಳು, ಸಾಮಾಜಿಕ ಸಂಸ್ಥೆಗಳು ಮತ್ತು ವಿವಿಧ ಮಾಧ್ಯಮ ವೇದಿಕೆಗಳಲ್ಲಿ ಆ ದಿನ ದೊಡ್ಡ ಪ್ರಮಾಣದಲ್ಲಿ ಮದುವೆಗಳು ಹಾಗೂ ಸಾಮಾಜಿಕ ನಿಶ್ಚಿತಾರ್ಥಗಳು ನಿಗದಿಯಾಗಿದ್ದು, ಇದರಿಂದ ಹೆಚ್ಚಿನ ಸಂಖ್ಯೆಯ ಜನರಿಗೆ ಅನಾನುಕೂಲತೆ ಉಂಟಾಗಲಿದೆ. ಮತದಾನದ ಸಮಯದಲ್ಲಿ ಕಡಿಮೆ ಮತದಾರರ ಭಾಗವಹಿಸುವಿಕೆಗೆ ಕಾರಣವಾಗಬಹುದು ಎಂದು ಮತದಾನದ ದಿನಾಂಕದ ಬದಲಿಗೆ ಮನವಿ ಸ್ವೀಕರಿತ್ತು. ಈ ಅಂಶಗಳನ್ನು ಆಯೋಗವು ಪರಿಗಣಿಸಿ ಮತದಾನದ ದಿನಾಂಕವನ್ನು ನವೆಂಬರ್​ 23ರ (ಗುರುವಾರ) ಬದಲಿಗೆ ನವೆಂಬರ್​ 25ಕ್ಕೆ (ಶನಿವಾರ) ಬದಲಾಯಿಸಲು ನಿರ್ಧರಿಸಲಾಗಿದೆ” ಎಂದು ಕಾರ್ಯದರ್ಶಿ ಸಂಜೀವ್ ಕುಮಾರ್ ಪ್ರಸಾದ್ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಉಳಿದಂತೆ, ಚುನಾವಣೆಗೆ ಅಧಿಸೂಚನೆ ಅಕ್ಟೋಬರ್​ 30ರಂದು ಹೊರಡಿಸಲಾಗುತ್ತದೆ. ನವೆಂಬರ್​ 6ರಂದು ನಾಮಪತ್ರಗಳ ಸ್ವೀಕಾರ ಕೊನೆಯಾಗಲಿದೆ. ನ.7ರಂದು ನಾಮಪತ್ರಗಳ ಕ್ರಮಬದ್ಧತೆ ಘೋಷಣೆ ಹಾಗೂ ನ.9ರಂದು ನಾಮಪತ್ರಗಳ ಹಿಂಪಡೆಯಲು ಅಂತಿಮ ದಿನವಾಗಲಿದೆ. ಮತ ಎಣಿಕೆ ಡಿಸೆಂಬರ್​ 3ರಂದು ನಡೆಯಲಿದೆ.

ಒಂದೇ ದಿನ 20 ಸಾವಿರ ಮದುವೆಗಳು?: ರಾಜಸ್ಥಾನದಾದ್ಯಂತ ನವೆಂಬರ್​ 23ರಂದು ದೇವ್ ಉಠನಿ ಏಕಾದಶಿ ಆಚರಿಸಲಾಗುತ್ತಿದೆ. ಈ ಏಕಾದಶಿಯನ್ನು ಮಂಗಳಕರ ಕಾರ್ಯಗಳಿಗೆ ವಿಶೇಷ ದಿನವೆಂದು ಪರಿಗಣಿಸಲಾಗಿದೆ. ಆದ್ದರಿಂದ ಇದೇ ದಿನ ರಾಜಸ್ಥಾನದಲ್ಲಿ ಹೆಚ್ಚಿನ ಸಂಖ್ಯೆಯ ಮದುವೆಗಳು ನಡೆಯುತ್ತವೆ. ಒಂದು ಅಂದಾಜಿನ ಪ್ರಕಾರ, ರಾಜ್ಯದಲ್ಲಿ ಈ ದಿನ 20 ಸಾವಿರಕ್ಕೂ ಹೆಚ್ಚು ಮದುವೆಗಳು ನಡೆಯಲಿವೆ!.

ಇದೇ ಕಾರಣಕ್ಕೆ ಚುನಾವಣಾ ದಿನಾಂಕ ಘೋಷಣೆಯಾದ ಕೂಡಲೇ ರಾಜಸ್ಥಾನದಲ್ಲಿ ಮತದಾನದ ದಿನಾಂಕವನ್ನು ಬದಲಾಯಿಸಬೇಕೆಂಬ ಬೇಡಿಕೆಗಳು ಹೆಚ್ಚಾಗತೊಡಗಿದ್ದವು. ಹಲವು ರಾಜಕೀಯ ಪಕ್ಷಗಳು ಕೂಡ ಮತದಾನದ ದಿನಾಂಕ ಬದಲಾಯಿಸುವಂತೆ ಒತ್ತಾಯಿಸಿದ್ದವು. ಈ ಸಾರ್ವಜನಿಕರ ಭಾವನೆಗಳನ್ನು ಗಮನದಲ್ಲಿಟ್ಟುಕೊಂಡು ಚುನಾವಣಾ ಆಯೋಗವು ಚುನಾವಣಾ ವೇಳಾಪಟ್ಟಿಯಲ್ಲಿ ಬದಲಾವಣೆ ಮಾಡಿದೆ.