ಫೋನ್​ ಮಾಡಿದ ತಕ್ಷಣ ಕೆಮ್ಮುವ ಧ್ವನಿ ಕೇಳ್ತಿದ್ದೀರಾ..? ಅದು ಕೊರೊನಾ ಕಾಲರ್​ಟ್ಯೂನ್..!

ನಿನ್ನೆ ಮೊನ್ನೆಯಿಂದ ಯಾರಿಗಾದ್ರೂ ಫೋನ್​ ಮಾಡಿದ ತಕ್ಷಣ ಆ ಕಡೆಯಿಂದ ಕೆಮ್ಮುವ ಧ್ವನಿಯನ್ನ ಹಲವರು ಕೇಳಿರಬಹುದು. ಇದನ್ನ ಕೇಳಿದ ಅನೇಕರು ಅರೇ ಇದೇನಪ್ಪಾ ಇನ್ನೂ ರಿಂಗ್​ ಆಗಿಲ್ಲ ಆಗ್ಲೇ ಯಾರೋ ಕೆಮ್ಮುತ್ತಿದ್ದಾರಲ್ಲ ಅಂತಲೂ ಅಂದುಕೊಂಡಿರಬಹುದು.? ಇದಕೆಲ್ಲಾ ಕಾರಣ ಬೇರೇನೂ ಅಲ್ಲ. ಸದ್ಯ, ವಿಶ್ವಕ್ಕೇ ತಲೆನೋವಾಗಿ ಪರಿಣಮಿಸಿರೋ ಕೊರೊನಾವೈರಸ್

ಹೌದು. ಕೊರೊನಾವೈರಸ್​ ಬಗ್ಗೆ ಜಾಗೃತಿ ಮೂಡಿಸಲು ಕೇಂದ್ರ ದೂರ ಸಂಪರ್ಕ ಇಲಾಖೆ ಈ ರೀತಿಯ ವಿಭಿನ್ನ ಪ್ರಯತ್ನ ಮಾಡಿದೆ. ಮೊಬೈಲ್​ ಬಳಕೆದಾರರ ಫೋನ್​ ಕಾಲ್​ ಕನೆಕ್ಟ್​ ಆಗುವ ಮುಂಚೆ ಒಂದು ಕಾಲರ್​ ಟ್ಯೂನ್​ ಸೆಟ್​ ಮಾಡಲಾಗಿದೆ. 30 ಸೆಕೆಂಡುಗಳ ಕಾಲರ್​ ಟ್ಯೂನ್​ ಇದಾಗಿದ್ದು, ಇದರಲ್ಲಿ ಕೊರೊನಾವೈರಸ್​ನಿಂದ ಪಾರಾಗುವುದು ಹೇಗೆ ಎಂಬುದರ ಬಗ್ಗೆ ಸೂಚನೆಗಳನ್ನು ನೀಡಲಾಗುತ್ತದೆ. ಎಲ್ಲಾ ಟೆಲಿಕಾಂ ಸಂಸ್ಥೆಗಳು ಈ ಕಾಲರ್​ ಟ್ಯೂನ್​ನ ತಮ್ಮ ಗ್ರಾಹಕರಿಗೆ ತಪ್ಪದೇ ಸೆಟ್​ ಮಾಡುವಂತೆ ಆದೇಶಿಸಲಾಗಿದೆ.
ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯದ ಮನವಿಯ ಮೇರೆಗೆ ಕೇಂದ್ರ ದೂರ ಸಂಪರ್ಕ ಇಲಾಖೆ ಈ ರೀತಿಯ ಕಾಲರ್​ ಟ್ಯೂನ್​ ಸಿದ್ಧಪಡಿಸಿದೆ.

ಆದ್ರೆ, ಈಗಾಗಲೇ ಸಿನಿಮಾ ಹಾಡುಗಳು, ಇನ್ನಿತರ ವಿವಿಧ ಬಗೆಯ ಕಾಲರ್​ ಟ್ಯೂನ್ಸ್​ ಹೊಂದಿರುವ ಗ್ರಾಹಕರಿಗೆ ಈ ಕೊರೊನಾವೈರಸ್​ ಆಡಿಯೋ ಮೆಸೇಜ್ ಅನ್ವಯವಾಗುವುದಿಲ್ಲ. ಈಗಾಗಲೇ ಕೇಂದ್ರ ಸರ್ಕಾರದ ಈ ಆದೇಶವನ್ನು ಬಿಎಸ್​ಎನ್​ಎಲ್​ ಮತ್ತು ಜಿಯೋ ಸಂಸ್ಥೆಗಳು ಪೂರ್ಣ ಪ್ರಮಾಣದಲ್ಲಿ ಜಾರಿಗೊಳಿಸಿದ್ದು, ಇನ್ನುಳಿದ ಟೆಲಿಕಾಂ ಸಂಸ್ಥೆಗಳೂ ಪಾಲಿಸಬೇಕಿದೆ.