ಪತ್ನಿ ನವಾಜ್​ರಿಂದ ಬೇರ್ಪಟ್ಟ ರೇಮಂಡ್ಸ್​ ಅಧ್ಯಕ್ಷ ಗೌತಮ್ ಸಿಂಘಾನಿಯಾ

ತಾವಿಬ್ಬರೂ ಇನ್ನು ಮುಂದೆ ಬೇರ್ಪಡುವುದಾಗಿ ತಿಳಿಸಿದ ಸಿಂಘಾನಿಯಾ, ತಮ್ಮ ಹೆಣ್ಣುಮಕ್ಕಳಾದ ನಿಹಾರಿಕಾ ಮತ್ತು ನಿಸಾ ಅವರ ಉತ್ತಮ ಭವಿಷ್ಯಕ್ಕೆ ಏನೆಲ್ಲ ಮಾಡಬಹುದೋ ಅದನ್ನೆಲ್ಲ ಮಾಡುತ್ತೇವೆ ಎಂದು ಸ್ಪಷ್ಟಪಡಿಸಿದರು. “ದಯವಿಟ್ಟು ನಮ್ಮ ಈ ವೈಯಕ್ತಿಕ ನಿರ್ಧಾರವನ್ನು ಗೌರವಿಸಿ ಮತ್ತು ಈ ಸಂಬಂಧದ ಎಲ್ಲಾ ಅಂಶಗಳನ್ನು ಪರಿಹರಿಸಲು ದಯವಿಟ್ಟು ನಮಗೆ ಅವಕಾಶ ನೀಡಿ. ಈ ಸಮಯದಲ್ಲಿ ಇಡೀ ಕುಟುಂಬಕ್ಕೆ ನಿಮ್ಮ ಶುಭ ಹಾರೈಕೆಗಳನ್ನು ಕೋರುತ್ತೇನೆ” ಎಂದು ಸಿಂಘಾನಿಯಾ ಬರೆದಿದ್ದಾರೆ.

ರೇಮಂಡ್ ಗ್ರೂಪ್​ನ ಮಾಜಿ ಅಧ್ಯಕ್ಷ ವಿಜಯಪತ್ ಸಿಂಘಾನಿಯಾ ಅವರ ಕಿರಿಯ ಪುತ್ರರಾದ ಗೌತಮ್ ಸಿಂಘಾನಿಯಾ 1999 ರಲ್ಲಿ ತಮ್ಮ ದೀರ್ಘಕಾಲದ ಪ್ರಿಯತಮೆ ನವಾಜ್ ಮೋದಿ ಅವರನ್ನು ವಿವಾಹವಾದರು.

ನವಾಜ್ ಮುಂಬೈನಲ್ಲಿ ಜನಿಸಿದರು. ಅವರಿಗೆ ಹಿರಿಯ ಮತ್ತು ಕಿರಿಯ ಸಹೋದರ ಇದ್ದಾರೆ. ಅವರ ತಂದೆ ವಕೀಲರಾಗಿದ್ದರು. ನವಾಜ್ 10 ವರ್ಷದವರಿದ್ದಾಗ ಅವರ ಪೋಷಕರು ಬೇರ್ಪಟ್ಟರು. ಸಹೋದರರು ತಂದೆಯಂತೆ ವಕೀಲಿ ವೃತ್ತಿಯಲ್ಲಿ ತೊಡಗಿಸಿಕೊಂಡಿದ್ದಾರೆ. ನವಾಜ್ ಕೂಡ ಕಾನೂನಿನಲ್ಲಿ ಪದವಿ ಪಡೆದಿದ್ದಾರೆ.

ಗೌತಮ್ ಸಿಂಘಾನಿಯಾ ಕೆಲ ವರ್ಷಗಳ ಹಿಂದೆ ತನ್ನ ತಂದೆ ವಿಜಯಪತ್ ಅವರೊಂದಿಗಿನ ಜಗಳದ ಕಾರಣದಿಂದ ಸುದ್ದಿಯಲ್ಲಿದ್ದರು. ರೇಮಂಡ್​ ಗ್ರೂಪ್ ಅನ್ನು ವಿಜಯಪತ್ ಸಿಂಘಾನಿಯಾ ಸ್ಥಾಪಿಸಿದರು. ಇದು ಬಟ್ಟೆ ಬ್ರಾಂಡ್​ಗಳು ಮತ್ತು ಜವಳಿಗಳನ್ನು ಉತ್ಪಾದಿಸುವ ಮೂಲಕ ಭಾರತದಲ್ಲಿ ಪ್ರಖ್ಯಾತವಾಗಿದೆ. ಇವರ ಮಗ ಗೌತಮ್ ಆದಾಯ ವಿಸ್ತರಿಸುವ ಪ್ರಯತ್ನವಾಗಿ ಕಂಪನಿಯ ಕಾರ್ಯಕ್ಷೇತ್ರವನ್ನು ವಿಸ್ತರಿಸಿದರು.