ರಾಜ್ಯಸಭೆಗೆ ನಾಲ್ವರ ನೇಮಕ: ಏನಿದೆ ವಿಶೇಷ, ಏನೇನಕ್ಕೆ ಆದ್ಯತೆ?

ದಕ್ಷಿಣ ಭಾರತಕ್ಕೇ ಆದ್ಯತೆ
ಸಾಮಾನ್ಯವಾಗಿ ಕೇಂದ್ರ ಸರ್ಕಾರ ಉತ್ತರ ಭಾರತೀಯರಿಗೇ ಮಣೆ ಹಾಕುತ್ತದೆ, ದಕ್ಷಿಣ ಭಾರತವನ್ನು ಅಷ್ಟಾಗಿ ಗಣನೆಗೆ ತೆಗೆದುಕೊಳ್ಳುವುದಿಲ್ಲ ಎಂಬ ಆರೋಪ ಅಲ್ಲಲ್ಲಿ ಕೇಳಿ ಬಂದಿದೆ. ಆದರೆ ಈ ಸಲ ರಾಜ್ಯಸಭೆಗೆ ನಾಮನಿರ್ದೇಶನ ಮಾಡುವ ಮೂಲಕ ಕೇಂದ್ರ ಸರ್ಕಾರ ದಕ್ಷಿಣ ಭಾರತಕ್ಕೇ ಆದ್ಯತೆ ನೀಡಿದೆ. ಏಕೆಂದರೆ ನೇಮಕಗೊಂಡಿರುವ ನಾಲ್ವರೂ ದಕ್ಷಿಣ ಭಾರತದವರು.

ಪ್ರಾದೇಶಿಕ ನ್ಯಾಯ
ರಾಜ್ಯಸಭೆಗೆ ನಾಲ್ವರು ದಕ್ಷಿಣ ಭಾರತದವರನ್ನು ಆಯ್ಕೆ ಮಾಡಿದ್ದಷ್ಟೇ ಅಲ್ಲದೆ, ಕೇಂದ್ರ ಸರ್ಕಾರ ಈ ವಿಷಯದಲ್ಲಿ ಪ್ರಾದೇಶಿಕ ನ್ಯಾಯವನ್ನೂ ಮೆರೆದಿದೆ. ಅದೇನೆಂದರೆ ನಾಲ್ವರೂ ಬೇರೆ ಬೇರೆ ರಾಜ್ಯದವರು. ಕರ್ನಾಟಕದ ಡಾ.ವೀರೇಂದ್ರ ಹೆಗ್ಗಡೆ, ಕೇರಳದ ಪಿ.ಟಿ.ಉಷಾ, ತಮಿಳುನಾಡಿನ ಇಳಯರಾಜ, ಆಂಧ್ರಪ್ರದೇಶದ ಕೆ.ವಿ. ವಿಜಯೇಂದ್ರ ಪ್ರಸಾದ್ ಅವರನ್ನು ನೇಮಕ ಮಾಡಲಾಗಿದೆ.

ವೈವಿಧ್ಯಮಯ ಆಯ್ಕೆ
ಈ ಸಲದ ನಾಲ್ವರ ನೇಮಕದ ಮೂಲಕ ನಾಲ್ಕು ವಿಭಿನ್ನ ಕ್ಷೇತ್ರಕ್ಕೂ ಮನ್ನಣೆ ನೀಡಿದಂತಾಗಿದೆ. ಆ ಮೂಲಕ ವಿಭಿನ್ನ ಮನಸ್ಥಿತಿಯ ಜನರ ಮನಸ್ಸನ್ನು ಗೆಲ್ಲುವ ಪ್ರಯತ್ನ ಮಾಡಲಾಗಿದೆ. ಹೆಗ್ಗಡೆಯವರ ಆಯ್ಕೆ ಮೂಲಕ ಧಾರ್ಮಿಕ-ಸಾಂಸ್ಕೃತಿಕ-ಶೈಕ್ಷಣಿಕ ಕ್ಷೇತ್ರದವರನ್ನು, ಪಿ.ಟಿ. ಉಷಾ ಆಯ್ಕೆ ಮೂಲಕ ಕ್ರೀಡಾಕ್ಷೇತ್ರದವರನ್ನು, ಇಳಯರಾಜ ಆಯ್ಕೆ ಮೂಲಕ ಸಂಗೀತ ಕ್ಷೇತ್ರದವರನ್ನು ಹಾಗೂ ವಿಜಯೇಂದ್ರಪ್ರಸಾದ್ ಅವರ ಆಯ್ಕೆ ಮೂಲಕ ಸಿನಿಮಾ/ಸಾಹಿತ್ಯ ಕ್ಷೇತ್ರದವರನ್ನು ಮೆಚ್ಚಿಸುವ ಕೆಲಸ ಮಾಡಲಾಗಿದೆ.