ಬ್ರಿಕ್ಸ್‌ ದೇಶಗಳನ್ನು ಕೊಂಡಾಡಿ, ಜಿ7 ದೇಶಗಳಿಗೆ ಗುದ್ದು- ಮಹೀಂದ್ರಾ ಸಾಧನೆಗೆ ಪುಟಿನ್‌ ಮೆಚ್ಚುಗೆ

ನವದೆಹಲಿ: ರಷ್ಯಾ ಅಧ್ಯಕ್ಷ ವ್ಲಾದಿಮಿರ್‌ ಪುಟಿನ್‌ ಅವರು ಜಗತ್ತಿಗೆ ಬ್ರಿಕ್ಸ್‌ ಕೊಡುಗೆಯನ್ನು ಉಲ್ಲೇಖಿಸಿ ಭಾರತದ ಮಹೀಂದ್ರಾ ಕಂಪನಿಯ ಸಾಧನೆಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಬ್ರಿಕ್ಸ್ ಬಿಸಿನೆಸ್ ಫೋರಂ ಅನ್ನುದ್ದೇಶಿಸಿ ಮಾತನಾಡಿದ ಪುಟಿನ್, ವಿಶ್ವದ ಜನಸಂಖ್ಯೆಯ ಅರ್ಧಕ್ಕಿಂತ ಹೆಚ್ಚು ಪಾಲು ಬ್ರಿಕ್ಸ್ ದೇಶಗಳಲ್ಲಿದೆ. ಈ ಕಾರಣದಿಂದಾಗಿಯೇ ಅವುಗಳು ಅತ್ಯಂತ ಕ್ರಿಯಾತ್ಮಕ ಆಂತರಿಕ ಮಾರುಕಟ್ಟೆಗಳನ್ನು ಹೊಂದಿವೆ. ನಮ್ಮ ದೇಶಗಳಲ್ಲಿ ನಗರ ಪ್ರದೇಶಗಳ ಬೆಳವಣಿಗೆಯ ಭಾರಿ ಏರಿಕೆ ಕಂಡುಬರುತ್ತಿದೆ. ನಗರೀಕರಣವು ಅತ್ಯಂತ ವೇಗವಾಗಿ ನಡೆಯುತ್ತಿದ್ದು, ರಾಷ್ಟ್ರೀಯ ಕಂಪನಿಗಳು ಮುಂಚೂಣಿಗೆ ಬರುತ್ತಾ ಜಾಗತಿಕ ಮಟ್ಟದ ನಾಯಕರಾಗಿ ಹೊರಹೊಮ್ಮುತ್ತಿವೆ ಎಂದು ತಿಳಿಸಿದರು.

ಭಾರತದ ಮಹೀಂದ್ರಾ ಕಂಪನಿಯು ಐಟಿ ಮತ್ತು ಕೃತಕ ಬುದ್ಧಿಮತ್ತೆ  ಆಧಾರಿತ ಪರಿಹಾರಗಳನ್ನು ಒದಗಿಸುತ್ತಿದೆ. ಚೀನಾದ ಹುವಾವೇ ಜಾಗತಿಕ ಮಟ್ಟದಲ್ಲಿ ಪ್ರಸಿದ್ಧ ತಂತ್ರಜ್ಞಾನ ದೈತ್ಯವಾಗಿದೆ. ಬ್ರೆಜಿಲ್‌ನ ಎಂಬ್ರೇರ್ ಸಂಸ್ಥೆಯು ಏರೋಸ್ಪೇಸ್ ಉದ್ಯಮದಲ್ಲಿ ಪ್ರಬಲ ಸ್ಥಾನ ಪಡೆದಿದೆ. ಯುಎಇಯ ಡಿಪಿಒ ಸಂಸ್ಥೆಯು ಲಾಜಿಸ್ಟಿಕ್ಸ್ ಕ್ಷೇತ್ರದಲ್ಲಿ ಅತ್ಯಂತ ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸುತ್ತಿದೆ. ರಷ್ಯಾದ ರೊಸಾಟೊಮ್ ಸಂಸ್ಥೆಯು ಶಾಂತಿಯುತ ಪರಮಾಣು ಶಕ್ತಿ ಬಳಕೆಯಲ್ಲಿ ವಿಶ್ವದ ಅಗ್ರಮಾನ್ಯ ನಂಬರ್ ಒನ್ ಕಂಪನಿಯಾಗಿ ಗುರುತಿಸಿಕೊಂಡಿದೆ. ನಮ್ಮ ವ್ಯಾಪಾರ ಸಮುದಾಯದಿಂದ ಇಂತಹ ಇನ್ನೂ ಅನೇಕ ಯಶಸ್ಸಿನ ಕಥೆಗಳಿವೆ, ಆದರೆ ಈ ಪ್ರತಿಯೊಂದರ ಹಿಂದೆಯೂ ದಿನನಿತ್ಯದ ಕಠಿಣ ಪರಿಶ್ರಮವಿದೆ ಎಂದು ಹೇಳಿದರು.

ಕಳೆದ ಐದು ವರ್ಷಗಳಲ್ಲಿ, ವಿಶ್ವದ ಜಿಡಿಪಿಯ ಶೇ.40 ಕ್ಕಿಂತ ಹೆಚ್ಚು ಬ್ರಿಕ್ಸ್ ದೇಶಗಳಿಂದ ಉತ್ಪಾದಿಸಲ್ಪಟ್ಟಿದೆ. ಆದರೆ ಜಿ7 ರಾಷ್ಟ್ರಗಳ ಕೊಡುಗೆ ಕೇವಲ ಶೇ. 29 ರಷ್ಟಿದೆ. ಅವರನ್ನು ಏಕೆ ಗ್ರೂಪ್ ಆಫ್ ಸೆವೆನ್ ಎಂದು ಕರೆಯುತ್ತಾರೆ ಎಂಬುದು ನನಗೆ ತಿಳಿದಿಲ್ಲ ಎಂದು ಹೇಳುವ ಮೂಲಕ ಪುಟಿನ್‌ ವ್ಯಂಗ್ಯವಾಡಿದರು.

ನಮ್ಮ ಪಾಶ್ಚಿಮಾತ್ಯ ಪ್ರತಿಸ್ಪರ್ಧಿಗಳು ನಮಲ್ಲಿರುವ ಅತ್ಯುತ್ತಮ ಸ್ಪರ್ಧಾತ್ಮಕ ಶಕ್ತಿಯನ್ನು ನಾಶಮಾಡಲು ಎಲ್ಲ ಪ್ರಯತ್ನಗಳನ್ನು ಮಾಡುತ್ತಿದ್ದಾರೆ. ಕೆಲವೊಮ್ಮೆ ಈ ಸ್ಪರ್ಧೆಯು ಅತ್ಯಂತ ವಿಕೃತ ರೂಪಗಳನ್ನು ಪಡೆದುಕೊಳ್ಳುತ್ತಿದೆ. ಕೆಲವೊಮ್ಮೆ ಪೈಪ್‌ಲೈನ್‌ಗಳನ್ನು ನಾಶಪಡಿಸುವುದು, ಅಂತರರಾಷ್ಟ್ರೀಯ ಸಾರಿಗೆ ಕಾರಿಡಾರ್‌ಗಳನ್ನು ನಿರ್ಬಂಧಿಸಲು ಯತ್ನಿಸುವುದು, ಸರಕು ಹಡಗುಗಳನ್ನು ವಶಪಡಿಸಿಕೊಳ್ಳುವುದು ಮತ್ತು ಇತರ ಕಾನೂನುಬಾಹಿರ ನಿರ್ಬಂಧಗಳನ್ನು ಹೇರುವಂತಹ ಭೌತಿಕ ಹಾನಿಯ ಕ್ರಮಗಳಿಗೆ ಇಳಿಯಲಾಗುತ್ತಿದೆ ಎಂದು ಅಸಮಾಧಾನ ಹೊರಹಾಕಿದರು.

ಬೇರೆಯವರ ಹಿತಾಸಕ್ತಿಗಳ ಹಿಂದೆ ಹೋಗದೆ ತಮ್ಮ ಸ್ವಂತ ಹಿತಾಸಕ್ತಿಗಳನ್ನು ಕಾಯ್ದುಕೊಳ್ಳಲು ಬಯಸುವವರ ಮೇಲೆ ಸೆಕೆಂಡರಿ ನಿರ್ಬಂಧ  ಹೇರುವ ಬೆದರಿಕೆಯೂ ಇದೆ. ಇದನ್ನು ಬೆಂಬಲಿಸಲು ನನ್ನ ಸಹೋದ್ಯೋಗಿಗಳು ನೂರಾರು ಉದಾಹರಣೆಗಳನ್ನು ನೀಡಬಲ್ಲರು ಎಂದು ನನಗೆ ತಿಳಿದಿದೆ. ರಷ್ಯಾದ ಮೇಲೆ ಬರೋಬ್ಬರಿ 30,000ಕ್ಕೂ ಹೆಚ್ಚು ನಿರ್ಬಂಧಗಳನ್ನು ವಿಧಿಸಲಾಗಿದೆ. ಇದು ವಿಶ್ವದ ಉಳಿದೆಲ್ಲ ದೇಶಗಳ ಮೇಲೆ ಹೇರಲಾದ ಒಟ್ಟು ನಿರ್ಬಂಧಗಳ ಸಂಖ್ಯೆಗಿಂತ ಎರಡರಷ್ಟಿದೆ. ನಾವು ಯಾರ ವಿರುದ್ಧವೂ ಇಲ್ಲ, ನಾವು ಮಾಡುತ್ತಿರುವ ಕೆಲಸವೂ ಯಾರ ವಿರುದ್ಧವೂ ಅಲ್ಲ. ನಾವು ನಮ್ಮ ಹಿತಾಸಕ್ತಿಗಳ ಪರವಾಗಿದ್ದೇವೆ ಮತ್ತು ನಮ್ಮ ಹಳೆಯ ಹಾಗೂ ಹೊಸ ಎಲ್ಲ ಪಾಲುದಾರರೊಂದಿಗೆ ಒಟ್ಟಾಗಿ ಕೆಲಸ ಮಾಡಲು ಸದಾ ಸಿದ್ಧರಿದ್ದೇವೆ. ಇಡೀ ವಿಶ್ವದೊಂದಿಗೆ ಕೆಲಸ ಮಾಡಲು ನಾವು ಸದಾ ಮುಕ್ತವಾಗಿದ್ದೇವೆ ಎಂದು ಹೇಳಿದರು.