ವಿಶ್ವಕಪ್‌ ಕ್ರಿಕೆಟ್ ಇತಿಹಾಸದಲ್ಲೇ ಅತಿದೊಡ್ಡ ಗೆಲುವು ದಾಖಲಿಸಿದ ಆಸ್ಟ್ರೇಲಿಯಾ! ನೆದರ್ಲೆಂಡ್ಸ್‌ ವಿರುದ್ಧ 309 ರನ್‌ಗಳ ಜಯಭೇರಿ

ಟೂರ್ನಿಯ ಆರಂಭದಲ್ಲಿ ಎರಡು ಸೋಲು ಕಂಡು ರನ್​ರೇಟ್​ ಕುಸಿತ ಅನುಭವಿಸಿದ್ದ ಕಾಂಗರೂ ಪಡೆ ದೆಹಲಿಯ ಬ್ಯಾಟಿಂಗ್‌ಸ್ನೇಹಿ ಪಿಚ್​ನಲ್ಲಿ ಅಬ್ಬರದ ಆಟ ಆಡಿ ಬೃಹತ್​ ಮೊತ್ತ ಕಲೆಹಾಕಿತು. ಡೇವಿಡ್​​ ವಾರ್ನರ್​, ಗ್ಲೆನ್​ ಮ್ಯಾಕ್ಸ್​ವೆಲ್​ ಶತಕ ಮತ್ತು ಸ್ಟೀವ್​ ಸ್ಮಿತ್​ ಮತ್ತು ಮಾರ್ನಸ್​ ಲಬುಶೇನ್​ ಅರ್ಧಶತಕ ಗಳಿಸಿದರು. ಇವರ ಇನ್ನಿಂಗ್ಸ್​ ನೆರವಿನಿಂದ ತಂಡ 399 ರನ್​ ಗಳಿಸಿತು.

ನೆದರ್ಲೆಡ್ಸ್‌ ಆರಂಭಿಕ ಆಟಗಾರ ವಿಕ್ರಮಜಿತ್ ಸಿಂಗ್ 25 ರನ್​ ಗಳಿಸಿದ್ದು ಬಿಟ್ಟರೆ, ತಂಡದ ಬೇರಾವುದೇ ಆಟಗಾರ ದೊಡ್ಡ ಮೊತ್ತ ದಾಖಲಿಸಲಿಲ್ಲ. ಮ್ಯಾಕ್ಸ್ ಓಡೌಡ್ (6), ಕಾಲಿನ್ ಅಕರ್ಮನ್ (10), ಸೈಬ್ರಾಂಡ್ ಎಂಗಲ್ಬ್ರೆಕ್ಟ್ (11), ಬಾಸ್ ಡಿ ಲೀಡೆ (4), ಲೋಗನ್ ವ್ಯಾನ್ ಬೀಕ್ (0), ರೋಲೋಫ್ ವ್ಯಾನ್ ಡೆರ್ ಮೆರ್ವೆ (0), ಆರ್ಯನ್ ದತ್ತ್ (1), ಪಾಲ್ ವ್ಯಾನ್ ಮೀಕೆರೆನ್ (0) 15 ರನ್ ಕೆಲೆಹಾಕಿದರು. ನಾಯಕ ಸ್ಕಾಟ್ ಎಡ್ವರ್ಡ್ಸ್ (12) ಅಜೇಯವಾಗುಳಿದರೂ ಏನು ಪ್ರಯೋಜನ ಆಗಲಿಲ್ಲ.

ದಾಖಲೆ: 21 ಓವರ್​ಗೆ 90 ರನ್​ ನೆದರ್ಲೆಂಡ್ಸ್ ಆಲ್​ಔಟ್​ ಆಗಿದ್ದರಿಂದ ವಿಶ್ವಕಪ್​ನಲ್ಲಿ ಆಸ್ಟ್ರೇಲಿಯಾ ದಾಖಲೆಯ ಗೆಲುವು ಸಾಧಿಸಿತು. ಈ ಹಿಂದೆ ಆಸ್ಟ್ರೇಲಿಯಾ ಅಫ್ಘಾನಿಸ್ತಾನದ ವಿರುದ್ಧ 275 ರನ್‌ಗಳ ಗೆಲುವು ರೆಕಾರ್ಡ್​ ಆಗಿತ್ತು. ಆಸಿಸ್​ ತನ್ನ ದಾಖಲೆಯನ್ನೇ ಮುರಿದು ಇಂದು 309 ರನ್‌ಗಳಿಂದ ಗೆದ್ದು ಹೊಸ ದಾಖಲೆ ಬರೆಯಿತು.

ಗ್ಲೆನ್​ ಮ್ಯಾಕ್ಸ್​ವೆಲ್ ಪಂದ್ಯಶ್ರೇಷ್ಠ: ಆಸ್ಟ್ರೇಲಿಯಾ ಪರ ಆರಂಭದಲ್ಲಿ ವೇಗಿಗಳು ಪರಿಣಾಮಕಾರಿಯಾಗಿ ಬೌಲಿಂಗ್​ ಮಾಡಿದರೆ, 15ನೇ ಓವರ್​ ನಂತರ ದಾಳಿಗಿಳಿದ ಝಂಪಾ 3 ಓವರ್​ ಮಾಡಿ ಕೇವಲ 8 ರನ್​ ಕೊಟ್ಟು 4 ವಿಕೆಟ್​ ಕಿತ್ತರು. ಮಿಚೆಲ್​ ಮಾರ್ಷ್​ 2 ಮತ್ತು ಪ್ಯಾಟ್​ ಕಮಿನ್ಸ್​​, ಜೋಶ್ ಹ್ಯಾಜಲ್‌ವುಡ್, ಮಿಚೆಲ್​​​ ಸ್ಟಾರ್ಕ್​ ತಲಾ ಒಂದು ವಿಕೆಟ್​ ಕಿತ್ತರು. 40 ಎಸೆತದಲ್ಲಿ ಶತಕ ಗಳಿಸಿದ ಗ್ಲೆನ್​ ಮ್ಯಾಕ್ಸ್​ವೆಲ್ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.