ಛಲವಾದಿ ನಾರಾಯಣಸ್ವಾಮಿಗೆ ಚಾಕು, ಚೂರಿ ಕಳಿಸಿದ್ದು ಸರಿಯಲ್ಲ; ನಮ್ಮವರೇ ಮಾಡಿದರೂ ತಪ್ಪು: ಪರಮೇಶ್ವರ್

ಬೆಂಗಳೂರು: ವಿಧಾನ ಪರಿಷತ್ ವಿಪಕ್ಷ ನಾಯಕ ಛಲವಾದಿ ನಾರಾಯಣಸ್ವಾಮಿಗೆ ಚಾಕು ಮತ್ತು ಚೂರಿ ಕಳುಹಿಸಿದ ಪ್ರಕರಣಕ್ಕೆ ಉಪಮುಖ್ಯಮಂತ್ರಿ ಡಾ. ಜಿ. ಪರಮೇಶ್ವರ್  ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ರಾಜಕೀಯದಲ್ಲಿ ಟೀಕೆ-ಟಿಪ್ಪಣಿಗಳು ಇರಬೇಕು. ಆದರೆ ಇಂತಹ ಕೃತ್ಯಗಳಿಗೆ ಅವಕಾಶ ನೀಡಬಾರದು ಎಂದು ಹೇಳಿದ್ದಾರೆ.

ಬೆಂಗಳೂರಿನಲ್ಲಿ ಮಾತನಾಡಿದ ಅವರು, ಇಂದಿನ ರಾಜಕೀಯ ಬೇರೆ ರೀತಿಯಲ್ಲಿ ಸಾಗುತ್ತಿದೆ. ಇಂತಹ ಘಟನೆಗಳ ಅಗತ್ಯವಿರಲಿಲ್ಲ. ಜನರು ನಮ್ಮನ್ನು ಗೆಲ್ಲಿಸಿರುವುದು ಕೆಲಸ ಮಾಡಲು. ಟೀಕೆ-ಟಿಪ್ಪಣಿಗಳು ಒಂದೆರಡು ದಿನ ಇರಲಿ, ಆದರೆ, ಅದನ್ನು ಮುಂದುವರಿಸಬಾರದು. ಯಾರೇ ಆಗಲಿ ಇಂತಹ ಕೆಲಸ ಮಾಡಬಾರದು. ನಾರಾಯಣಸ್ವಾಮಿ ಅವರು ಮಾತನಾಡುವ ರೀತಿ ಸರಿಯಿಲ್ಲದಿರಬಹುದು. ಆದರೆ ನಮ್ಮವರೇ ಈ ಕೃತ್ಯ ಮಾಡಿದ್ದರೂ ಅದು ತಪ್ಪು ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಬರ ಪರಿಹಾರದ ಪತ್ರಕ್ಕೆ ಪ್ರಧಾನಿ ಉತ್ತರ ನೀಡಿಲ್ಲ
ಬರ ಪರಿಹಾರ ವಿಚಾರವಾಗಿ ಚರ್ಚಿಸಲು ಸಮಯ ಕೋರಿ ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಪತ್ರ ಬರೆದಿದ್ದರೂ ಈವರೆಗೆ ಯಾವುದೇ ಪ್ರತಿಕ್ರಿಯೆ ಬಂದಿಲ್ಲ ಎಂದು ಪರಮೇಶ್ವರ್ ತಿಳಿಸಿದ್ದಾರೆ.

ಪತ್ರ ಬರೆದು ಎರಡು ವಾರಗಳಾಗಿವೆ. ಈವರೆಗೆ ಯಾವುದೇ ಉತ್ತರ ಬಂದಿಲ್ಲ. ಪ್ರಧಾನಿ ಮೋದಿ ಅವರು ನಾಡಿದ್ದು ರಾಜ್ಯಕ್ಕೆ ಬಂದಾಗಲೇ ಚರ್ಚೆಗೆ ಸಮಯ ಕೇಳುವುದು ಕಷ್ಟ. ಅವರ ಕಾರ್ಯಕ್ರಮಗಳು ಮೊದಲೇ ನಿಗದಿಯಾಗಿರುತ್ತವೆ. ಮತ್ತೆ ಮನವಿ ಮಾಡುತ್ತೇವೆ. ಅವರು ಸಮಯ ನೀಡಿದ ಬಳಿಕ ನಾನು ಮತ್ತು ಮುಖ್ಯಮಂತ್ರಿಗಳು ಹೋಗಬೇಕೇ ಅಥವಾ ಸರ್ವಪಕ್ಷಗಳ ನಿಯೋಗದೊಂದಿಗೆ ತೆರಳಬೇಕೇ ಎಂಬುದನ್ನು ತೀರ್ಮಾನಿಸುತ್ತೇವೆ ಎಂದರು.

ಅಧಿಕಾರಿಗಳ ತಪ್ಪಿನಿಂದ ಕಡಿಮೆ ಹಣ ಜಮೆ
ರೈತರ ಖಾತೆಗೆ ಘೋಷಿಸಿದ ಮೊತ್ತಕ್ಕಿಂತ ಕಡಿಮೆ ಪರಿಹಾರ ಜಮೆಯಾಗಿರುವುದಕ್ಕೆ ಅಧಿಕಾರಿಗಳ ತಪ್ಪು ಅರ್ಥೈಸುವಿಕೆಯೇ ಕಾರಣ ಎಂದು ಪರಮೇಶ್ವರ್ ಸ್ಪಷ್ಟಪಡಿಸಿದ್ದಾರೆ.

ಸದನದಲ್ಲಿ ತಾವು ಮತ್ತು ಮುಖ್ಯಮಂತ್ರಿ ಪ್ರತಿ ರೈತ ಕುಟುಂಬಕ್ಕೆ 2,500 ರೂ. ಬರ ಪರಿಹಾರ ನೀಡುವುದಾಗಿ ಘೋಷಿಸಿದ್ದೆವು. ಆದರೆ ಅಧಿಕಾರಿಗಳು ಎನ್‌ಡಿಆರ್‌ಎಫ್ ಮಾರ್ಗಸೂಚಿಗಳನ್ನು ತಪ್ಪಾಗಿ ಅರ್ಥೈಸಿಕೊಂಡಿದ್ದರಿಂದ ಡಿಬಿಟಿ ಮೂಲಕ 1,500 ರೂ. ಮಾತ್ರ ಜಮೆಯಾಗಿದೆ. ಈ ತಪ್ಪನ್ನು ಸರಿಪಡಿಸುವಂತೆ ಸೂಚನೆ ನೀಡಲಾಗಿದೆ ಎಂದು ತಿಳಿಸಿದರು.

ಮೊದಲ ಕಂತಿನಲ್ಲಿ ಪ್ರತಿ ರೈತ ಕುಟುಂಬಕ್ಕೆ 2,500 ರೂ. ಹಾಗೂ ಎರಡನೇ ಕಂತಿನಲ್ಲೂ 2,500 ರೂ. ನೀಡಲಾಗುವುದು. ಒಟ್ಟು 50 ಲಕ್ಷ ರೈತ ಕುಟುಂಬಗಳಿಗೆ ಮೊದಲ ಹಂತದಲ್ಲಿ 1,250 ಕೋಟಿ ರೂ. ಬಿಡುಗಡೆ ಮಾಡಲಾಗುತ್ತದೆ. ಎರಡನೇ ಕಂತಿನಲ್ಲೂ ಇದೇ ಪ್ರಮಾಣದ ಹಣ ನೀಡಲಾಗುವುದು. ಒಟ್ಟಾರೆ ಪ್ರತಿ ರೈತ ಕುಟುಂಬಕ್ಕೆ 5,000 ರೂ. ಪರಿಹಾರ ಸಿಗಲಿದೆ ಎಂದು ಭರವಸೆ ನೀಡಿದರು.

ಈಗಾಗಲೇ 1,200 ಮತ್ತು 1,300 ರೂ. ಗಳಷ್ಟು ಕಡಿಮೆ ಮೊತ್ತ ಜಮೆಯಾಗಿರುವ ಪ್ರಕರಣಗಳನ್ನೂ ಸರಿಪಡಿಸಲಾಗುವುದು. ಹಣಕಾಸು ಇಲಾಖೆಯಿಂದ ಹಣ ಬಿಡುಗಡೆ ಮಾಡಲಾಗಿದೆ. ಮೊದಲ ಕಂತಿನ ಪ್ರಕ್ರಿಯೆ ಪೂರ್ಣಗೊಂಡ ಬಳಿಕ ಎರಡನೇ ಕಂತಿನ ಹಣವನ್ನು ಜಮೆ ಮಾಡಲಾಗುತ್ತದೆ. ಡಿಸೆಂಬರ್ ಒಳಗೆ ಎರಡೂ ಕಂತುಗಳ ಹಣ ಪಾವತಿಸುವುದಾಗಿ ಪರಮೇಶ್ವರ್ ತಿಳಿಸಿದ್ದಾರೆ.