Laxmi News 24×7
ಬೆಳಗಾವಿಯಲ್ಲಿ 10 ಜೂಜುಕೋರರು; ಇಬ್ಬರು ಮಟ್ಕಾ ಆಡುವವರ ಬಂಧನ
ಬೆನಕನಹಳ್ಳಿಯಲ್ಲಿ ಜೂಜಾಟ ಆಡುತ್ತಿದ್ದ 10 ಜನರ ಬಂಧನ
ಮಾರ್ಕೆಟ್ ಪೊಲೀಸರಿಂದ ಮಟ್ಕಾ ಆಡುತ್ತಿದ್ದ ಇಬ್ಬರ ಬಂಧನ
ಬೆಳಗಾವಿ ಗ್ರಾಮೀಣ ಮತ್ತು ಮಾರ್ಕೆಟ್ ಪೊಲೀಸ್ ಠಾಣೆಗಳಲ್ಲಿ ಪ್ರಕರಣ ದಾಖಲು
₹56,840 ನಗದು ಮತ್ತು ಇತರೆ ವಸ್ತು ವಶ
ಬೆಳಗಾವಿ ನಗರ ಪೊಲೀಸ್ ಕಮಿಷನರೇಟ್ ವ್ಯಾಪ್ತಿಯಲ್ಲಿ ಜೂಜಾಟದ ವಿರುದ್ಧ ನಡೆದ ಎರಡು ವಿಶೇಷ ಕಾರ್ಯಾಚರಣೆಗಳಲ್ಲಿ ಪೊಲೀಸರು ಒಟ್ಟು 12 ಆರೋಪಿಗಳನ್ನು ಬಂಧಿಸಿದ್ದಾರೆ. ಈ ಎರಡು ಪ್ರತ್ಯೇಕ ಕಾರ್ಯಾಚರಣೆಗಳಲ್ಲಿ ಜೂಜಾಟ ಆಡುತ್ತಿದ್ದವರಿಂದ ₹56,840 ನಗದು ಮತ್ತು ಇತರ ವಸ್ತು ಸೇರಿದಂತೆ ಒಟ್ಟು ₹57,440 ಮೌಲ್ಯದ ವಸ್ತುಗಳನ್ನು ಜಪ್ತಿ ಮಾಡಲಾಗಿದೆ.
ಬೆಳಗಾವಿ ಗ್ರಾಮೀಣ ಪೊಲೀಸ್ ಠಾಣಾ ವ್ಯಾಪ್ತಿಯ ಬೆನಕನಹಳ್ಳಿ ಗ್ರಾಮದ ಹೊಲದಲ್ಲಿ ಕೆಲವರು ಜೂಜಾಟ ಆಡುತ್ತಿದ್ದಾರೆ ಎಂಬ ಖಚಿತ ಮಾಹಿತಿ ಪೊಲೀಸರಿಗೆ ಲಭ್ಯವಾಗಿತ್ತು. ಗ್ರಾಮೀಣ ಪೊಲೀಸ್ ಠಾಣೆಯ ಉಪನಿರೀಕ್ಷಕ ಸಂತೋಷ ದಳವಾಯಿ ಮತ್ತು ಅವರ ಸಿಬ್ಬಂದಿ ತಕ್ಷಣ ದಾಳಿ ನಡೆಸಿದರು.
ಸಂತೋಷ ಪರಮಾರ್ , ಸುರೇಶ ಅನಗೋಳಕರ್, ಬಾಬು ದೊಡ್ಡಮನಿ, ಬಸವರಾಜ ಶಿಗ್ಗಿಹಳ್ಳಿ, ಹಿದಾಯತುಲ್ಲಾ ಮಕಾಂದಾರ್, ಆನಂದ ಕಸ್ತೂರಿ, ತೌಫಿಕ್ ಪಾಕೀರ್, ಅಲಿಸಾಬ ಮಸನಕಟ್ಟಿ ,ಮಲಿಕ್ ಗುಡಾವಳೆ, ತವನಪ್ಪ ಬೆನ್ನಾಳಿ ಅವರಿಂದ ₹53,600 ನಗದು ಮತ್ತು ಇತರ ಪರಿಕರಗಳನ್ನು ಜಪ್ತಿ ಮಾಡಲಾಗಿದೆ. ಅಲ್ಲದೆ, ಜೂಜಾಟಕ್ಕೆ ಸ್ಥಳಾವಕಾಶ ನೀಡಿದ ಕಾರಣಕ್ಕಾಗಿ ಪ್ರಫುಲ್ಲ ಪಾಟೀಲ ಮತ್ತು ಸಂಜಯ ನಾಯಕ್ ಇಬ್ಬರ ಮೇಲೂ ಪ್ರಕರಣ ದಾಖಲಿಸಲಾಗಿದೆ.
ಮತ್ತೊಂದು ಪ್ರತ್ಯೇಕ ಕಾರ್ಯಾಚರಣೆಯಲ್ಲಿ, ಮಾರ್ಕೆಟ್ ಪೊಲೀಸ್ ಠಾಣೆಯ ಉಪನಿರೀಕ್ಷಕ ವಿಠ್ಠಲ ಹಾವಣ್ಣವರ ಮತ್ತು ಅವರ ತಂಡವು ಹಳೆಯ ತರಕಾರಿ ಮಾರುಕಟ್ಟೆ (ಜೂಜಾ ಮಾರ್ಕೆಟ್) ಪ್ರದೇಶದಲ್ಲಿ ಜೂಜಾಟ ಆಡುತ್ತಿದ್ದವರ ಮೇಲೆ ದಾಳಿ ನಡೆಸಿತು.ಈ ಪ್ರಕರಣದಲ್ಲಿ ಗಜಾನನ ಗರಡೆ ಮತ್ತು ಕಿಶೋರ ಸಾವಂತ ಇಬ್ಬರನ್ನು ಬಂಧಿಸಿ, ಅವರಿಂದ ₹3,240 ನಗದು ಮತ್ತು ಇತರೆ ಸಾಮಗ್ರಿಗಳನ್ನು ಜಪ್ತಿ ಮಾಡಿ, ಅವರ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ.ಒಟ್ಟು ಎರಡು ಪ್ರಕರಣಗಳಲ್ಲಿ 12 ಆರೋಪಿಗಳನ್ನು ವಶಕ್ಕೆ ಪಡೆದು ₹57,440 ಮೌಲ್ಯದ ಸೊತ್ತುಗಳನ್ನು ಜಪ್ತಿ ಮಾಡಿದ ಉಪನಿರೀಕ್ಷಕರು ಮತ್ತು ಸಿಬ್ಬಂದಿಯ ಕಾರ್ಯವನ್ನು ಬೆಳಗಾವಿ ನಗರ ಪೊಲೀಸ್ ಆಯುಕ್ತರು ಮತ್ತು ಉಪ ಆಯುಕ್ತರು ಅಭಿನಂದಿಸಿದ್ದಾರೆ.
