ಹೆಲಿಕಾಪ್ಟರ್, ವಿಮಾನದ ಇಂಧನದಲ್ಲೂ ಕಬ್ಬಿನ ಉಪ ಉತ್ಪನ್ನ ”ಎಥೆನಾಲ್”

ಬೆಂಗಳೂರು: ಕಬ್ಬಿನ ಉಪ ಉತ್ಪನ್ನಗಳಲ್ಲಿ ಒಂದಾದ ”ಎಥೆನಾಲ್” ಅನ್ನು ಇನ್ನು ಮುಂದೆ ವಿಮಾನಗಳು ಮತ್ತು ಹೆಲಿಕಾಪ್ಟರ್​​ನಲ್ಲಿ ಬಳಸಲಾಗುವ ಇಂಧನಕ್ಕೂ ಮಿಶ್ರಣ ಮಾಡಲಾಗುತ್ತದೆ ಎಂದು ದಕ್ಷಿಣ ಭಾರತ ಸಕ್ಕರೆ ಕೈಗಾರಿಕೆಗಳ ಸಂಘ (ಸಿಸ್ಮಾ) ದ ಅಧ್ಯಕ್ಷರಾಗಿರುವ ಕೈಗಾರಿಕೋದ್ಯಮಿ ಮುರುಗೇಶ ನಿರಾಣಿ ತಿಳಿಸಿದ್ದಾರೆ.

ಕೇಂದ್ರ ಸರ್ಕಾರವು ಎಥೆನಾಲ್ ಅನ್ನು ವಿಮಾನ ಮತ್ತು ಹೆಲಿಕಾಪ್ಟರ್​ನಲ್ಲಿ ಬಳಸಲಾಗುವ ಇಂಧನಕ್ಕೆ ಶೇ.5 ರಷ್ಟು ಮಿಶ್ರಣ ಮಾಡಲು ಪರವಾನಗಿ ನೀಡಿದೆ. ಈ ಬೆಳವಣಿಗೆಯಿಂದ ಎಥೆನಾಲ್ ದರವು ಹೆಚ್ಚಾಗಿ ಕಬ್ಬು ಬೆಳೆಯುವ ರೈತರಿಗೆ ಅತ್ಯಧಿಕ ಬೆಲೆ ದೊರೆಯಲಿದೆ. 2027 ರ ವೇಳೆಗೆ ವಿಮಾನ, ಹೆಕಾಪ್ಟರ್​​ಗಳು ಬಳಸುವ ಪೆಟ್ರೋಲ್​​ನಲ್ಲಿ ಎಥೆನಾಲ್ ಮಿಶ್ರಣ ಮಾಡುವ ವ್ಯವಸ್ಥೆ ಜಾರಿಗೆ ಬರಲಿದೆ ಎಂದು ಮಾಧ್ಯಮಗೋಷ್ಟಿಯಲ್ಲಿ ನಿರಾಣಿ ತಿಳಿಸಿದರು.

ವಿಮಾನ, ಹೆಲಿಕಾಪ್ಟರ್​​ಗಳಿಗೆ ಸ್ಯಾಫ್ (ಸಸ್ಟನೇಬಲ್ ಏವಿಯೇಶನ್ ಫ್ಯುಯೆಲ್) ನಡಿ ಕಬ್ಬಿನ ಜ್ಯೂಸ್ ಮತ್ತು ಮೆಕ್ಕೆಜೋಳ, ಭತ್ತದಿಂದ ಉಪ ಉತ್ಪನ್ನವಾಗಿ ಉತ್ಪಾದಿಸಲಾಗುವ ಎಥೆನಾಲ್ ಮಿಶ್ರಣ ಮಾಡಬಹುದೆಂದು ಎಂಜನಿಯರ್​ಗಳು ತಿಳಿಸಿದ್ದು, ಇದಕ್ಕೆ ಕೇಂದ್ರ ಸರ್ಕಾರದ ಅನುಮತಿಯೂ ದೊರೆತಿದೆ ಎಂದು ಮಾಹಿತಿ ನೀಡಿದರು. ಇದರಿಂದ ಕಬ್ಬು ಮತ್ತು ಭತ್ತ, ಮೆಕ್ಕೆಜೋಳದ ಧಾನ್ಯಗಳಿಂದ ಬೈ ಪ್ರಾಡಕ್ಟ್ ಆಗಿ ಉತ್ಪಾದನೆ ಮಾಡಲಾಗುವ ಎಥೆನಾಲ್ ಜಲಮಾರ್ಗ, ಭೂಮಾರ್ಗ ಮತ್ತು ವಾಯು ಮಾರ್ಗದ ವಾಹನಗಳಲ್ಲಿ ಬಳಸಿದಂತಾಗುತ್ತದೆ ಎಂದರು.