ಚೆನ್ನೈ: ದೇಶಾದ್ಯಂತ ಭಾರಿ ಬೆಲೆ ಕಂಡಿರುವ ಟೊಮೆಟೊ ಸದ್ಯಕ್ಕೆ ‘ತರಕಾರಿಗಳ ರಾಜ’ನಾಗಿದೆ.
ಪ್ರತಿ ಕೆಜಿಗೆ ಗರಿಷ್ಠ 150 ರಿಂದ 160 ರೂಪಾಯಿವರೆಗೆ ಬಿಕರಿಯಾಗುತ್ತಿದೆ. ಬೆಲೆ ಗಗನಕ್ಕೇರಿ ಜನರ ಕೈ ಸುಡುತ್ತಿರುವ ಟೊಮೆಟೊವನ್ನು ತಮಿಳುನಾಡು ಸರ್ಕಾರ ಪಡಿತರ ಅಂಗಡಿಗಳಲ್ಲಿ ಕಡಿಮೆ ಬೆಲೆಗೆ ಮಾರಾಟ ಮಾಡುತ್ತಿದೆ. ಗ್ರಾಹಕರಿಗೆ 60 ರೂಪಾಯಿಗೆ ಕೆಜಿ ಟೊಮೆಟೊ ಸಿಗುತ್ತಿದೆ.
ಸೋಮವಾರಷ್ಟೇ ಸುದ್ದಿಗೋಷ್ಠಿ ನಡೆಸಿ ಮಾಹಿತಿ ನೀಡಿದ್ದ ಸಹಕಾರಿ ಸಚಿವ ಪೆರಿಯಗರುಪ್ಪನ್, ಪಡಿತರ ಅಂಗಡಿಗಳಲ್ಲಿ ಕಡಿಮೆ ಬೆಲೆಗೆ ಟೊಮೆಟೊ ಸಿಗಲಿದೆ. ಇದಕ್ಕಾಗಿ ಎಲ್ಲ ಅಂಗಡಿಗಳಲ್ಲಿ ಸಿದ್ಧತೆ ಮಾಡಿಕೊಳ್ಳಲಾಗಿದೆ ಎಂದು ತಿಳಿಸಿದ್ದರು. ಅದರಂತೆ ಬುಧವಾರದಿಂದ ಪಡಿತರ ಧಾನ್ಯಗಳ ಜೊತೆಗೆ ಕೆಂಪು ತರಕಾರಿ ಕೂಡ ಲಭ್ಯವಿದೆ.
ಚೆನ್ನೈ ನಗರದ ಪಾಂಡಿ ಬಜಾರ್ನಲ್ಲಿರುವ ಪಡಿತರ ಅಂಗಡಿಯಲ್ಲಿ ಮಾಲೀಕ ಧಾನ್ಯಗಳ ಜೊತೆಗೆ ಟೊಮೆಟೊವನ್ನೂ ಗ್ರಾಹಕರಿಗೆ ವಿತರಿಸುತ್ತಿರುವುದು ಕಂಡುಬಂತು. ಪ್ರತಿ ಕೆಜಿಗೆ 60 ರೂಪಾಯಿ ಎಂಬ ಬೋರ್ಡ್ ಕೂಡ ನೇತು ಹಾಕಲಾಗಿದೆ. ರಾಜ್ಯದ ಚಿಲ್ಲರೆ ಮಾರುಕಟ್ಟೆಯಲ್ಲಿ ಟೊಮೆಟೊ ಕೆಜಿಗೆ 100 ರಿಂದ 130 ರೂಪಾಯಿ ಇದ್ದು, ಅದರ ಅರ್ಧ ದರದಲ್ಲಿ ಸರ್ಕಾರವೇ ಮಾರಾಟ ಮಾಡುತ್ತಿದೆ. ಇದು ಜನರಿಗೆ ಸಂತಸ ತಂದಿದೆ. ಸರ್ಕಾರದ ಜನಪರ ಕಾಳಜಿಗೆ ಮೆಚ್ಚುಗೆ ಕೂಡ ವ್ಯಕ್ತವಾಗಿದೆ.