ಚುನಾವಣೆಯಲ್ಲಿ ಸೋತರೂ ವೀಟೋ ಬಳಸಿ ಡೆಮಾಕ್ರಟ್‌ಗಳನ್ನು ಆಟ ಆಡಿಸಲು ಮುಂದಾದ ಟ್ರಂಪ್‌!

ವಾಷಿಂಗ್ಟನ್‌: ಮಧ್ಯಂತರ ಚುನಾವಣೆಯಲ್ಲಿ  ವಿರೋಧ ಪಕ್ಷವಾದ ಡೆಮಾಕ್ರಟಿಕ್ ಪಕ್ಷವು ಕಾಂಗ್ರೆಸ್‌ನಲ್ಲಿ (ಸಂಸತ್ತು) ಬಹುಮತ ಪಡೆದ ಬೆನ್ನಲ್ಲೇ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಮ್ಮ ವೀಟೋ ಅಧಿಕಾರ (Veto Power) ಬಳಸುವುದಾಗಿ ಎಚ್ಚರಿಸಿದ್ದಾರೆ.

ಕಾಂಗ್ರೆಸ್ ಅಂಗೀಕರಿಸುವ ಯಾವುದೇ ಮಸೂದೆಯನ್ನು ತಡೆಹಿಡಿಯಲು ತಮಗೆ ಈ ಪರಮಾಧಿಕಾರವಿದ್ದು, ತಾವು ಮುಂಬರುವ ದಿನಗಳಲ್ಲಿ ಮಿಸ್ಟರ್ ವೀಟೋ  ಆಗಿ ಬದಲಾಗಲಿದ್ದೇನೆ ಎಂದು ಟ್ರಂಪ್ ಘೋಷಿಸಿದ್ದಾರೆ.

ಅಮೆರಿಕದ ಸಂವಿಧಾನದ ಆರ್ಟಿಕಲ್ 1, ಸೆಕ್ಷನ್ 7ರ ಅಡಿಯಲ್ಲಿ ಅಧ್ಯಕ್ಷರಿಗೆ ಎರಡು ರೀತಿಯ ವೀಟೋ ಅಧಿಕಾರಗಳಿವೆ.

ಸಾಮಾನ್ಯ ವೀಟೋ : ಕಾಂಗ್ರೆಸ್‌ನ ಎರಡೂ ಸದನಗಳು (ಹೌಸ್ ಆಫ್ ರೆಪ್ರೆಸೆಂಟೆಟಿವ್ಸ್ ಮತ್ತು ಸೆನೆಟ್) ಪಾಸ್ ಮಾಡಿದ ಮಸೂದೆಯನ್ನು ಅಧ್ಯಕ್ಷರು ಒಪ್ಪದಿದ್ದರೆ, ಅವರು ಸಹಿ ಮಾಡದೆ ತಮ್ಮ ಆಕ್ಷೇಪಣೆಗಳೊಂದಿಗೆ ವಾಪಸ್ ಕಳುಹಿಸಬಹುದು.

ಪಾಕೆಟ್ ವೀಟೋ : ಕಾಂಗ್ರೆಸ್ ಅಧಿವೇಶನ ಮುಕ್ತಾಯಗೊಳ್ಳುವ ಕೊನೆಯ 10 ದಿನಗಳಲ್ಲಿ (ಭಾನುವಾರಗಳನ್ನು ಹೊರತುಪಡಿಸಿ) ಮಸೂದೆಯೊಂದು ಅಧ್ಯಕ್ಷರ ಬಳಿ ಬಂದು, ಅಧ್ಯಕ್ಷರು ಅದಕ್ಕೆ ಸಹಿ ಹಾಕದೆ ಹಾಗೇ ಇಟ್ಟುಕೊಂಡರೆ ಆ ಮಸೂದೆ ತಾನಾಗಿಯೇ ರದ್ದಾಗುತ್ತದೆ. ಇದಕ್ಕೆ ಕಾಂಗ್ರೆಸ್‌ನಿಂದ ಯಾವುದೇ ತಿರುಗೇಟು ನೀಡಲು ಸಾಧ್ಯವಿಲ್ಲ.

ಅಧ್ಯಕ್ಷರು ತಿರಸ್ಕರಿಸಿದ ಮಸೂದೆಯನ್ನು ಕಾನೂನು ಮಾಡಲು ಕಾಂಗ್ರೆಸ್‌ಗೆ ಮತ್ತೊಂದು ಅವಕಾಶವಿರುತ್ತದೆ. ಆದರೆ, ಅದಕ್ಕಾಗಿ ಕಾಂಗ್ರೆಸ್‌ನ ಎರಡೂ ಸದನಗಳಲ್ಲಿ ಮೂರನೇ ಎರಡರಷ್ಟು (2/3) ಭಾರಿ ಬಹುಮತದ ಅಗತ್ಯವಿದೆ.

ಮಧ್ಯಂತರ ಚುನಾವಣೆಯ ಅಂತಿಮ ಫಲಿತಾಂಶಗಳ ಪ್ರಕಾರ ಡೆಮಾಕ್ರಟಿಕ್ ಪಕ್ಷವು ಕಾಂಗ್ರೆಸ್‌ನ ಎರಡೂ ಸದನಗಳಲ್ಲಿ ಸ್ಪಷ್ಟ ಬಹುಮತವನ್ನು ಸಾಧಿಸಿದೆಯಾದರೂ, ಅಧ್ಯಕ್ಷರ ವೀಟೋವನ್ನು ರದ್ದುಗೊಳಿಸಲು (Veto Override) ಅಗತ್ಯವಿರುವ ಮೂರನೇ ಎರಡರಷ್ಟು ಭಾರಿ ಬಹುಮತವನ್ನು ಪಡೆಯಲು ಸಾಧ್ಯವಾಗಿಲ್ಲ.

ಸದನಗಳ ಪ್ರಸ್ತುತ ಬಲದ ವಿವರ ಹೀಗಿದೆ:
• ಹೌಸ್ ಆಫ್ ರೆಪ್ರೆಸೆಂಟೇಟಿವ್ಸ್ (ಕೆಳಮನೆ): ಒಟ್ಟು 435 ಸ್ಥಾನಗಳಲ್ಲಿ ಬಹುಮತಕ್ಕೆ 218 ಸ್ಥಾನಗಳ ಅಗತ್ಯವಿದ್ದು, ಡೆಮಾಕ್ರಟ್‌ಗಳು ಸುಮಾರು 237 ರಿಂದ 239 ಸ್ಥಾನಗಳನ್ನು ಗೆದ್ದಿದ್ದಾರೆ. ಆದರೆ, ಮೂರನೇ ಎರಡರಷ್ಟು ಬಹುಮತಕ್ಕೆ ಕನಿಷ್ಠ 290 ಸ್ಥಾನಗಳ ಅಗತ್ಯವಿರುತ್ತದೆ.
• ಸೆನೆಟ್ (ಮೇಲ್ಮನೆ): ಒಟ್ಟು 100 ಸ್ಥಾನಗಳಲ್ಲಿ ಡೆಮಾಕ್ರಟ್‌ಗಳು 54 ಸ್ಥಾನಗಳನ್ನು ಗೆದ್ದು ಸ್ಪಷ್ಟ ಬಹುಮತ ಪಡೆದಿದ್ದಾರೆ. ಆದರೆ, ಮೂರನೇ ಎರಡರಷ್ಟು ಬಹುಮತಕ್ಕೆ ಕನಿಷ್ಠ 67 ಸ್ಥಾನಗಳ ಅಗತ್ಯವಿರುತ್ತದೆ.

ಟ್ರಂಪ್‌ ಏನು ಮಾಡಬಹುದು?
ಈ ವೀಟೋ ಬಳಸಿ ಇಡೀ ಮಸೂದೆಯನ್ನು ಟ್ರಂಪ್‌ ಸಂಪೂರ್ಣವಾಗಿ ತಿರಸ್ಕರಿಸಬಹುದೇ ವಿನಃ, ಅದರಲ್ಲಿ ತಮಗೆ ಬೇಕಾದ ಬದಲಾವಣೆ ಅಥವಾ ತಿದ್ದುಪಡಿಗಳನ್ನು ಮಾಡಲು ಬರುವುದಿಲ್ಲ.

ವೀಟೋ ಅಧಿಕಾರದ ಎಚ್ಚರಿಕೆ ನೀಡುವ ಮೂಲಕ ಟ್ರಂಪ್ ಅವರು ತಮಗೆ ಇಷ್ಟವಿಲ್ಲದ ಕಾನೂನುಗಳನ್ನು ತಡೆಯುವುದು ಮಾತ್ರವಲ್ಲದೆ, ಡೆಮಾಕ್ರಟ್‌ಗಳು ತಮ್ಮೊಂದಿಗೆ ಮಾತುಕತೆಗೆ ಬರುವಂತೆ ಒತ್ತಡ ಹೇರುವ ತಂತ್ರ ಹೂಡಿದ್ದಾರೆ.

ಡೆಮಾಕ್ರಟ್‌ಗಳು ಏನು ಮಾಡಬಹುದು?
ಡೆಮಾಕ್ರಟ್‌ಗಳು ಕಾಂಗ್ರೆಸ್‌ನಲ್ಲಿ ಸಾಮಾನ್ಯ ಬಹುಮತ ಹೊಂದಿರುವುದರಿಂದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಹೊಸ ಮಸೂದೆಗಳನ್ನು ತಡೆಯಬಹುದು. ಆದರೆ, ಡೆಮಾಕ್ರಟ್‌ಗಳು ತಾವಾಗಿಯೇ ಜಾರಿಗೆ ತರಲು ಬಯಸುವ ಕಾನೂನುಗಳನ್ನು ಟ್ರಂಪ್ ಅವರು ‘ವೀಟೋ ಅಧಿಕಾರ’ ಬಳಸಿ ತಿರಸ್ಕರಿಸಿದರೆ, ಅದನ್ನು ರದ್ದುಗೊಳಿಸುವ (Override) ಶಕ್ತಿ ಡೆಮಾಕ್ರಟ್‌ಗಳಿಗಿರುವುದಿಲ್ಲ. ಹೀಗಾಗಿ ಟ್ರಂಪ್ ಅವರ ವೀಟೋ ನಿರ್ಧಾರವೇ ಅಂತಿಮವಾಗಲಿದ್ದು, ಮುಂದಿನ ಎರಡು ವರ್ಷಗಳ ಕಾಲ ಅಮೆರಿಕದಲ್ಲಿ ‘ವಿಭಜಿತ ಸರ್ಕಾರ’ (Divided Government) ಆಡಳಿತ ನಡೆಸಲಿದೆ.