ವಿಶ್ವಕಪ್ ಬಿಗ್​ ಫೈಟ್: ಟಾಸ್​ ಗೆದ್ದ ಇಂಗ್ಲೆಂಡ್ ಬೌಲಿಂಗ್​ ಆಯ್ಕೆ,​ ನಾಯಕನಾಗಿ ರೋಹಿತ್​ಗೆ 100ನೇ ಪಂದ್ಯ​

ಧರ್ಮಶಾಲಾದಲ್ಲಿ ನಡೆದ ಪಂದ್ಯದಲ್ಲಿ ನ್ಯೂಜಿಲೆಂಡ್​ ವಿರುದ್ಧ ಗೆಲುವು ಸಾಧಿಸುವ ಮೂಲಕ ಭಾರತ ಸತತ ಐದನೇ ಗೆಲುವು ಸಾಧಿಸಿದೆ. ಈ ಮೂಲಕ ಅಂಕಪಟ್ಟಿಯಲ್ಲಿ ಎರಡನೇ ಸ್ಥಾನ ಪಡೆದಿದೆ. ಇನ್ನೊಂದೆಡೆ, ಸತತ ಸೋಲಿನಿಂದ ಕಂಗೆಟ್ಟಿರುವ ಇಂಗ್ಲೆಂಡ್​ ಐದು ಪಂದ್ಯದಲ್ಲಿ ನಾಲ್ಕು ಪಂದ್ಯಗಳಲ್ಲಿ ಸೋತು ಅಂಕಪಟ್ಟಿಯಲ್ಲಿ ಕೊನೆ ಸ್ಥಾನದಲ್ಲಿದೆ.

ರೋಹಿತ್​ ನಾಯಕತ್ವದ 100ನೇ ಪಂದ್ಯ: ಇಂಗ್ಲೆಂಡ್​ ವಿರುದ್ಧದ ಪಂದ್ಯವನ್ನು ಭಾರತದ ಆರಂಭಿಕ ಆಟಗಾರ ರೋಹಿತ್​ ಶರ್ಮಾ ಮುನ್ನಡೆಸುತ್ತಿದ್ದಾರೆ. ರೋಹಿತ್​ ಶರ್ಮಾ ನಾಯಕನಾಗಿ ಭಾರತವನ್ನು ಮುನ್ನಡೆಸುತ್ತಿರುವ ನೂರನೇ ಪಂದ್ಯ ಇದಾಗಿದ್ದು, ಈ ಮೂಲಕ ಮತ್ತೊಂದು ಮೈಲಿಗಲ್ಲು ಸಾಧಿಸಲು ಶರ್ಮಾ ಮುಂದಾಗಿದ್ದಾರೆ. 2017 ಡಿಸೆಂಬರ್ 10ರಂದು ರೋಹಿತ್​ ಶರ್ಮಾ ಮೊದಲ ಬಾರಿಗೆ ಭಾರತ ತಂಡವನ್ನು ಮುನ್ನಡೆಸಿದ್ದರು. ಶ್ರೀಲಂಕಾ ವಿರುದ್ಧದ ಏಕದಿನ ಪಂದ್ಯದಲ್ಲಿ ರೋಹಿತ್​ ಶರ್ಮಾ ಭಾರತ ತಂಡವನ್ನು​ ಮುನ್ನಡೆಸಿದ್ದರು. ಬಳಿಕ 2021ರ ಅಂತ್ಯದಲ್ಲಿ ವಿರಾಟ್​​ ಕೊಹ್ಲಿ ತಂಡದ ನಾಯಕತ್ವ ವಹಿಸಿಕೊಂಡರು.

ರೋಹಿತ್​ ಶರ್ಮಾ ನಾಯಕತ್ವದಲ್ಲಿ ಭಾರತ ತಂಡವು ಇದುವರೆಗೆ ಒಟ್ಟು 99 ಪಂದ್ಯಗಳನ್ನು ಆಡಿದೆ. 99 ಪಂದ್ಯಗಳಲ್ಲಿ ಒಟ್ಟು 73 ಪಂದ್ಯಗಳಲ್ಲಿ ಜಯಗಳಿಸಿದ್ದು, 23 ಪಂದ್ಯಗಳನ್ನು ಸೋತಿದ್ದಾರೆ. ಮೂರು ಪಂದ್ಯಗಳಲ್ಲಿ ಯಾವುದೇ ಫಲಿತಾಂಶ ಇಲ್ಲ. ರೋಹಿತ್​ ಮುನ್ನಡೆಸಿದ ಪಂದ್ಯಗಳಲ್ಲಿ ಒಟ್ಟು ಶೇ. 73.37ರಷ್ಟು ಪಂದ್ಯಗಳಲ್ಲಿ ಗೆಲುವು ಸಾಧಿಸಿದ್ದಾರೆ.

51 ಟಿ 20 ಪಂದ್ಯದಲ್ಲಿ 39 ಪಂದ್ಯಗಳಲ್ಲಿ ಗೆಲುವು ಗಳಿಸಿದ್ದು, 12 ಪಂದ್ಯಗಳಲ್ಲಿ ಸೋಲಾಗಿದೆ. ಈ ಮೂಲಕ ಟಿ 20 ಪಂದ್ಯದಲ್ಲಿ ಶೇ. 76.47ರಷ್ಟು ಗೆಲುವು ಸಾಧಿಸಿದ್ದಾರೆ. ಟೆಸ್ಟ್​ ಪಂದ್ಯದಲ್ಲಿ ರೋಹಿತ್​ 9 ಪಂದ್ಯಗಳನ್ನು ಮುನ್ನಡೆಸಿದ್ದು, ಐದು ಬಾರಿ ಗೆಲುವು ಸಾಧಿಸಿದ್ದಾರೆ. 2 ಬಾರಿ ಸೋಲನುಭವಿಸಿದ್ದು, 2 ಪಂದ್ಯಗಳು ಡ್ರಾ ಆಗಿವೆ. 39 ಏಕದಿನ ಪಂದ್ಯಗಳನ್ನು ಮುನ್ನಡೆಸಿರುವ ರೋಹಿತ್​ 29 ಪಂದ್ಯಗಳಲ್ಲಿ ಗೆಲುವು ಸಾಧಿಸಿದ್ದಾರೆ. 9 ಪಂದ್ಯಗಳಲ್ಲಿ ಸೋಲು ಅನುಭವಿಸಿದ್ದು, ಒಂದು ಪಂದ್ಯ ಡ್ರಾ ಆಗಿದೆ. ಇಂಗ್ಲೆಂಡ್​ ವಿರುದ್ಧ ನೂರನೇ ಪಂದ್ಯವನ್ನು ರೋಹಿತ್​ ಮುನ್ನಡೆಸುತ್ತಿದ್ದಾರೆ.

ಇಂಗ್ಲೆಂಡ್​ ವಿರುದ್ಧದ ಗೆಲುವು ಭಾರತಕ್ಕೆ ನಾಲ್ಕು ಫೈನಲ್​ ತಂಡಗಳ ಪಟ್ಟಿಯಲ್ಲಿ ಸ್ಥಾನ ಪಡೆಯಲು ಸಹಕಾರಿಯಾಗುತ್ತದೆ. ಅಂಕಿ ಅಂಶಗಳ ಪ್ರಕಾರ ಇಂಗ್ಲೆಂಡ್​ ತಂಡಕ್ಕೆ ಸೆಮಿಫೈನಲ್​ ಸುತ್ತಿಗೆ ಅರ್ಹತೆ ಪಡೆಯುವುದು ಕಷ್ಟ ಸಾಧ್ಯ ಎಂದು ಹೇಳಲಾಗಿದೆ.

ತಂಡಗಳು-ಭಾರತ: ರೋಹಿತ್​ ಶರ್ಮಾ(ನಾಯಕ), ಶುಭ್​ಮನ್​ ಗಿಲ್, ವಿರಾಟ್​​ ಕೊಹ್ಲಿ, ಶ್ರೇಯಸ್​ ಅಯ್ಯರ್, ಕೆ.ಎಲ್.ರಾಹುಲ್(ವಿಕೆಟ್​ ಕೀಪರ್​), ಸೂರ್ಯಕುಮಾರ್​ ಯಾದವ್, ರವೀಂದ್ರ ಜಡೇಜಾ, ಮೊಹಮ್ಮದ್​ ಶಮಿ, ಕುಲದೀಪ್​ ಯಾದವ್, ಮೊಹಮ್ಮದ್​ ಸಿರಾಜ್, ಜಸ್​ಪ್ರೀತ್​ ಬೂಮ್ರಾ

ಇಂಗ್ಲೆಂಡ್​: ಜಾನಿ ಬೇರ್‌ಸ್ಟೋವ್, ಡೇವಿಡ್​​ ಮಲನ್, ಜೋ ರೂಟ್, ಬೆನ್​ ಸ್ಟೋಕ್ಸ್, ಜೋಸ್​ ಬಟ್ಲರ್ (ನಾಯಕ, ವಿಕೆಟ್​ ಕೀಪರ್​), ಲಿಯಾಮ್​​ ಲಿವಿಂಗ್‌ಸ್ಟೋನ್, ಮೊಯಿನ್​ ಅಲಿ, ಕ್ರಿಸ್​​ ವೋಕ್ಸ್, ಡೇವಿಡ್​ ವಿಲ್ಲಿ, ಆದಿಲ್​ ರಶೀದ್, ಮಾರ್ಕ್ ವುಡ್.