ಇಂಗ್ಲೆಂಡ್ ಯುವತಿಯನ್ನು ಪ್ರೀತಿಸಿ ಮದುವೆಯಾದ ಗಂಗಾವತಿ ಹುಡುಗ

ಅಂದ ಹಾಗೆ ಗಂಗಾವತಿ ತಾಲೂಕಿನ ಸಣಾಪುರದ ನಿವಾಸಿ ಮುರಳಿ ಎಂಬ ಯುವಕ, ವೃತ್ತಿಯಲ್ಲಿ ಪ್ರವಾಸಿ ಮಾರ್ಗದರ್ಶಕ, ಗೆಸ್ಟ್​ಹೌಸ್ ಮಾಲೀಕ. ಇದೀಗ ಈತ ಸಿನಿಮಾ ರಂಗ ಕಲೆಯಲ್ಲಿ ಕತೆ ಬರೆಯುವ ಚಾರ್ಲೊಟ್ಟೆ ಮೇರಿ ಫಿಂಕ್ಲರ್ ಎಂಬ ಲಂಡನ್ ಯುವತಿಯನ್ನು ಶುಕ್ರವಾರ ಅಧಿಕೃತವಾಗಿ ವಿವಾಹವಾಗಿದ್ದಾರೆ.

ಕೊಪ್ಪಳ ತಾಲೂಕಿನ ಬಸಾಪುರ ಎಂಬ ಗ್ರಾಮದಲ್ಲಿರುವ ಮುರುಳಿ ಗೆಸ್ಟ್​ಹೌಸ್​​ನಲ್ಲಿ ಈ ಇಬ್ಬರು ಬೆಳಗ್ಗೆ 6.59 ನಿಮಿಷದ ಸುಮಹೂರ್ತದಲ್ಲಿ ಬಾಳ ಬಂಧನದ ಬೆಸುಗೆಯಲ್ಲಿ ಬಂಧಿಗಳಾದರು. ವಿವಾಹ ಮಹೂರ್ತಕ್ಕೆ ವಧು ಚಾರ್ಲೊಟ್ಟೆ ಮೇರಿ ಫಿಂಕ್ಲರ್ ಅವರ ತಂದೆ-ತಾಯಿ ಸೇರಿದಂತೆ ಹತ್ತಕ್ಕೂ ಹೆಚ್ಚು ಕುಟುಂಬ ಸದಸ್ಯರು ಕಳೆದ ಎರಡು ದಿನಗಳ ಹಿಂದೆಯೇ ಭಾರತಕ್ಕೆ ಬಂದಿದ್ದರು.

ಭಾರತೀಯ ಸಂಪ್ರದಾಯದ ಉಡುಪುಗಳಲ್ಲಿ ಬ್ರಿಟನ್ ಪ್ರಜೆಗಳು ಕಂಗೊಳಿಸಿದರು. ಪುರುಷರು ಬಿಳಿ ಪಂಚೆ-ಬಿಳಿ ಶರ್ಟ್​ಗಳಲ್ಲಿ, ಮಹಿಳೆಯರು ಜರಿಜರಿಯಾದ ಸೀರೆಗಳಲ್ಲಿ ಕಂಗೊಳಿಸಿದರು. ಹಿಂದೂ ಸಂಪ್ರದಾಯದಂತೆ ಮಗಳನ್ನು ಹುಡುಗನಿಗೆ ಧಾರೆ ಎರೆದುಕೊಟ್ಟರು.

ಇದಕ್ಕೂ ಮೊದಲು ಅಂದರೆ ಕಳೆದ ಏಪ್ರಿಲ್ 3ಕ್ಕೆ ಗಂಗಾವತಿಯ ಉಪ ನೊಂದಣಿ ಕಚೇರಿಯಲ್ಲಿ ಈ ಇಬ್ಬರು ತಮ್ಮ ಆಪ್ತ ಬಳಗದ ಬೆರಳೆಣಿಕೆಯಷ್ಟು ಸ್ನೇಹಿತರ ಸಮ್ಮುಖದಲ್ಲಿ ಮದುವೆಯನ್ನು ನೋಂದಣಿ ಮಾಡಿಸಿಕೊಂಡು, ವಿವಾಹ ಬಂಧನಕ್ಕೆ ಮುದ್ರೆಯೊತ್ತಿಸಿಕೊಂಡಿದ್ದರು.