Laxmi News 24×7
ಬೆಳಗಾವಿ: ಬೆಳಗಾವಿಯ ಅನಂತಶಯನಗಲ್ಲಿಯ ಭರತೇಶ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (ಎಎಂಬಿಐಟಿ)ಯ ‘ಟೀಮ್ ಇಂಪ್ಯಾಕ್ಟ್+’ ವಿದ್ಯಾರ್ಥಿಗಳ ತಂಡವು ರಾಷ್ಟ್ರೀಯ ಮಟ್ಟದ ‘ಹ್ಯಾಕ್ಟ್4ಹೈರ್-2026’ ಹ್ಯಾಕಥಾನ್‌ನಲ್ಲಿ ದ್ವಿತೀಯ ಸ್ಥಾನ ಪಡೆದು ಸಂಸ್ಥೆಗೆ ಕೀರ್ತಿ ತಂದಿದೆ.
ಮೈಸೂರಿನ ಮಹಾರಾಜ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯ ಸಿಎಸ್‌ಇ ವಿಭಾಗದ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ ಮತ್ತು ಮಷಿನ್ ಲರ್ನಿಂಗ್ ವಿಭಾಗದ ವತಿಯಿಂದ ಅಕ್ಟೋಬರ್ 30 ಮತ್ತು 31, 2026ರಂದು ಆಯೋಜಿಸಲಾಗಿದ್ದ ಈ ಪ್ರತಿಷ್ಠಿತ 24 ಗಂಟೆಗಳ ಹ್ಯಾಕಥಾನ್‌ನಲ್ಲಿ ದೇಶದ ವಿವಿಧ ಭಾಗಗಳಿಂದ 120ಕ್ಕೂ ಹೆಚ್ಚು ತಂಡಗಳು ಭಾಗವಹಿಸಿದ್ದವು.
ತೀವ್ರ ಪೈಪೋಟಿ ಹಾಗೂ ನಿಗದಿತ ಕಾಲಮಿತಿಯೊಳಗೆ ನೈಜ ಜಗತ್ತಿನ ಸಂಕೀರ್ಣ ಸಮಸ್ಯೆಗಳಿಗೆ ತಾಂತ್ರಿಕ ಪರಿಹಾರ ಕಂಡುಕೊಳ್ಳಬೇಕಿದ್ದ ಈ ಸ್ಪರ್ಧೆಯಲ್ಲಿ, ಹೈದರಾಬಾದ್‌ನ ‘ಟೆರೈಜೆನ್ ವೆಂಚರ್ಸ್’ ಸಂಸ್ಥೆ ನೀಡಿದ್ದ ಸವಾಲನ್ನು ಸಮರ್ಥವಾಗಿ ಎದುರಿಸಿದ ಎಎಂಬಿಐಟಿ ತಂಡವು ‘ಉದ್ಯಮ ನಿರ್ವಹಣೆಗಾಗಿ ಮಲ್ಟಿ-ಏಜೆಂಟ್ ಸಾಫ್ಟ್‌ವೇರ್’ ಎಂಬ ನವೀನ ತಂತ್ರಜ್ಞಾನ ಆಧಾರಿತ ಪರಿಹಾರವನ್ನು ಯಶಸ್ವಿಯಾಗಿ ಪ್ರಸ್ತುತಪಡಿಸಿ ರನ್ನರ್-ಅಪ್ ಸ್ಥಾನ ಗಳಿಸಿತು.
ತಂಡದಲ್ಲಿ ಎಐ ಮತ್ತು ಎಂಎಲ್ ವಿಭಾಗದ ಐದನೇ ಸೆಮಿಸ್ಟರ್ ವಿದ್ಯಾರ್ಥಿಗಳಾದ ಆದಿತ್ಯ ಶೆಟ್ಟಿ, ಸರ್ಜನ್ ಮುರುಗೋಡ್, ಆದರ್ಶ ಗುರವ್ ಹಾಗೂ ಸಿಎಸ್‌ಇ ವಿಭಾಗದ ಪ್ರಸನ್ನ ಜೈನ್ ಪಾಲ್ಗೊಂಡಿದ್ದರು. ಎಐ ಮತ್ತು ಎಂಎಲ್ ವಿಭಾಗದ ಪ್ರಾಧ್ಯಾಪಕ ಬಾಲಕೃಷ್ಣ ಟಿ. ಅವರು ತಂಡಕ್ಕೆ ಮಾರ್ಗದರ್ಶನ ನೀಡಿದ್ದರು.
ವಿದ್ಯಾರ್ಥಿಗಳ ಈ ಗಮನಾರ್ಹ ಸಾಧನೆಗೆ ಭರತೇಶ್ ಎಜುಕೇಶನ್ ಟ್ರಸ್ಟ್‌ನ ಆಡಳಿತ ಮಂಡಳಿ, ಡಾ. ಎಂ.ಎಸ್. ಪಾಟೀಲ್, ಪ್ರಾಂಶುಪಾಲರು, ಬೋಧಕ ಹಾಗೂ ಬೋಧಕೇತರ ಸಿಬ್ಬಂದಿ ಮತ್ತು ವಿದ್ಯಾರ್ಥಿಗಳು ಹರ್ಷ ವ್ಯಕ್ತಪಡಿಸಿ, ವಿಜೇತ ತಂಡವನ್ನು ಅಭಿನಂದಿಸಿದ್ದಾರೆ.
