ಶಾಸ್ತ್ರದ ಮಾತು ನಂಬಿ ಊರನ್ನೇ ತೊರೆದ ಗೌಳಿ ಕುಟುಂಬಗಳು – ಸಾವಿನ ಭಯಕ್ಕೆ ಗ್ರಾಮವೇ ಖಾಲಿ

ಕಾರವಾರ: ಶಾಸ್ತ್ರದಲ್ಲಿ ಹೇಳಿದ ಮಾತುಗಳನ್ನು ನಂಬಿ, ನಿರಂತರ ಸಾವುಗಳ ಭಯದಿಂದ ಗೌಳಿ ಸಮುದಾಯದ ಕುಟುಂಬಗಳು ಗ್ರಾಮವನ್ನೇ ತೊರೆಯುತ್ತಿರುವ ಘಟನೆ ಉತ್ತರ ಕನ್ನಡ ಜಿಲ್ಲೆಯ  ಜೋಯಿಡಾ ತಾಲೂಕಿನ ಬಾಡಗುಂದದಲ್ಲಿ ನಡೆದಿದೆ.

ಬಾಡಗುಂದ ಗ್ರಾಮದಲ್ಲಿ ಒಟ್ಟು 18 ಗೌಳಿ ಕುಟುಂಬಗಳ 103 ಮಂದಿ ವಾಸಿಸುತ್ತಿದ್ದರು. ಆದರೆ, ದೀಗ 13 ಕುಟುಂಬಗಳ 74 ಮಂದಿ ಗ್ರಾಮ ತೊರೆದಿದ್ದಾರೆ. ಉಳಿದ ಕುಟುಂಬಗಳೂ ಗ್ರಾಮ ತೊರೆಯಲು ಸಿದ್ಧತೆ ನಡೆಸುತ್ತಿವೆ ಎನ್ನಲಾಗಿದೆ.

ನಿರಂತರ ಸಾವುಗಳಿಂದ ಆತಂಕ
ತಲೆತಲಾಂತರದಿಂದ ಗೌಳಿ ಸಮುದಾಯದವರು ವಾಸಿಸುತ್ತಿರುವ ಬಾಡಗುಂದ ಗ್ರಾಮದಲ್ಲಿ ಹೈನುಗಾರಿಕೆಯೇ ಪ್ರಮುಖ ಜೀವನಾಧಾರ. ಕೃಷಿ ಮತ್ತು ಹೈನುಗಾರಿಕೆ ಮಾಡಿಕೊಂಡು ಬದುಕುತ್ತಿದ್ದ ಕುಟುಂಬಗಳು ಇದೀಗ ಮನೆ, ಜಮೀನು ಹಾಗೂ ಜೀವನೋಪಾಯವನ್ನೇ ಬಿಟ್ಟು ಬೇರೆಡೆಗೆ ತೆರಳುತ್ತಿರುವುದು ಆತಂಕಕ್ಕೆ ಕಾರಣವಾಗಿದೆ.

ಗ್ರಾಮದಲ್ಲಿ ಕಳೆದ ಕೆಲವು ವರ್ಷಗಳಲ್ಲಿ ಅಪಘಾತ ಸೇರಿದಂತೆ ವಿವಿಧ ಕಾರಣಗಳಿಂದ ಹಲವು ಮಂದಿ ಮೃತಪಟ್ಟಿದ್ದಾರೆ. ಒಂದರ ಮೇಲೊಂದರಂತೆ ಸಂಭವಿಸಿದ ಸಾವುಗಳಿಂದ ಗ್ರಾಮಸ್ಥರಲ್ಲಿ ಭಯದ ವಾತಾವರಣ ನಿರ್ಮಾಣವಾಗಿತ್ತು.

ಈ ಹಿನ್ನೆಲೆಯಲ್ಲಿ ಗ್ರಾಮದ ಕೆಲವರು ಹಿರಿಯರೊಬ್ಬರ ಬಳಿ ಶಾಸ್ತ್ರ ಕೇಳಿಸಿದ್ದಾರೆ ಎನ್ನಲಾಗಿದೆ. ಈ ವೇಳೆ ಗ್ರಾಮದಲ್ಲಿ ವಾಸಿಸುವ ಜಾಗದ ಸಮಸ್ಯೆಯಿದ್ದು, ಇದೇ ಸ್ಥಳದಲ್ಲಿ ಮುಂದುವರಿದರೆ ಮತ್ತಷ್ಟು ಸಾವುಗಳು ಸಂಭವಿಸಬಹುದು ಎಂದು ಶಾಸ್ತ್ರದಲ್ಲಿ ಹೇಳಲಾಗಿದೆ ಎಂಬುದು ಗ್ರಾಮಸ್ಥರ ನಂಬಿಕೆ. ಇದರಿಂದ ಆತಂಕಗೊಂಡ ಕುಟುಂಬಗಳು ಗ್ರಾಮ ತೊರೆಯಲು ಮುಂದಾಗಿವೆ.

ಈಗಾಗಲೇ 13 ಕುಟುಂಬಗಳ 74 ಮಂದಿ ಗ್ರಾಮ ತೊರೆದಿದ್ದಾರೆ. ಬಾಡಗುಂದದಲ್ಲಿ ವಾಸಿಸುತ್ತಿದ್ದ 18 ಕುಟುಂಬಗಳ ಪೈಕಿ ಈಗಾಗಲೇ 13 ಕುಟುಂಬಗಳು ಬೇರೆಡೆಗೆ ವಲಸೆ ಹೋಗಿವೆ.

ಜಂಗಲೇ ವಂಶಕ್ಕೆ ಸೇರಿದ ಆರು ಕುಟುಂಬಗಳು ರಾಮನಗರದ ಗಾರ್ಲಿ ಗ್ರಾಮಕ್ಕೆ ತೆರಳಿವೆ. ಶಿಂಧೆ ವಂಶದ ನಾಲ್ಕು ಕುಟುಂಬಗಳು ರಾಮನಗರದ ಅಡಾಳಿ ಗ್ರಾಮಕ್ಕೆ ವಲಸೆ ಹೋಗಿವೆ.

ಕರವತ್ತ ವಂಶದ ಒಂದು ಕುಟುಂಬ ಹಾಗೂ ರಾಮು ಪಾಟೀಲರ ಎರಡು ಕುಟುಂಬಗಳು ಯಲ್ಲಾಪುರಕ್ಕೆ ತೆರಳಿವೆ. ರಾಮು ಶಿಂಗಾಡಿ ಕುಟುಂಬ ಜೋಯಿಡಾದ ಪನಸೋಲಿ ಗ್ರಾಮಕ್ಕೆ ವಲಸೆ ಹೋಗಿದೆ ಎನ್ನಲಾಗಿದೆ. ಉಳಿದ ಕುಟುಂಬಗಳೂ ಗ್ರಾಮ ತೊರೆಯುವ ಸಿದ್ಧತೆಯಲ್ಲಿದ್ದು, ಭಯದಲ್ಲೇ ದಿನ ಕಳೆಯುತ್ತಿದ್ದಾರೆ.

ಪ್ರವಾಸೋದ್ಯಮ ಅಭಿವೃದ್ಧಿಯಾಗುತ್ತಿರುವ ಪ್ರದೇಶ
ಬಾಡಗುಂದ ಗ್ರಾಮ ಕಾಳಿ ಹುಲಿ ಸಂರಕ್ಷಿತ ಪ್ರದೇಶದ ವ್ಯಾಪ್ತಿಯಲ್ಲಿದೆ. ಗೌಳಿ ಸಮುದಾಯದವರು ಹಲವು ತಲೆಮಾರುಗಳಿಂದ ಇಲ್ಲಿ ವಾಸಿಸುತ್ತಿದ್ದಾರೆ. ಇತ್ತೀಚಿನ ವರ್ಷಗಳಲ್ಲಿ ಈ ಭಾಗದಲ್ಲಿ ಪ್ರವಾಸೋದ್ಯಮವೂ ಅಭಿವೃದ್ಧಿಯಾಗುತ್ತಿದ್ದು, ಸುತ್ತಮುತ್ತ ರೆಸಾರ್ಟ್‌ಗಳು ಹಾಗೂ ಹೋಂಸ್ಟೇಗಳು ನಿರ್ಮಾಣಗೊಂಡಿವೆ.

ಇಂತಹ ಸಂದರ್ಭದಲ್ಲಿ ಶಾಸ್ತ್ರದ ಮಾತುಗಳನ್ನು ನಂಬಿ ಗ್ರಾಮಸ್ಥರು ತಮ್ಮ ವಾಸಸ್ಥಳವನ್ನೇ ತೊರೆಯುತ್ತಿರುವುದು ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಇದು ಮೂಢನಂಬಿಕೆಯ ಪರಿಣಾಮವೇ ಅಥವಾ ಗ್ರಾಮಸ್ಥರ ಆತಂಕದ ಹಿಂದೆ ಬೇರೆ ಕಾರಣಗಳಿವೆಯೇ ಎಂಬ ಚರ್ಚೆಯೂ ನಡೆಯುತ್ತಿದೆ.

ರಿಯಲ್ ಎಸ್ಟೇಟ್ ವ್ಯವಹಾರದ ಅನುಮಾನ?
ಗ್ರಾಮಸ್ಥರು ಊರು ತೊರೆಯುತ್ತಿರುವ ಹಿನ್ನೆಲೆಯಲ್ಲಿ ಸ್ಥಳಕ್ಕೆ ತಹಸೀಲ್ದಾರ್ ಮಂಜುನಾಥ್ ಭೇಟಿ ನೀಡಿ ಮಾಹಿತಿ ಸಂಗ್ರಹಿಸಿದ್ದಾರೆ.

ಗ್ರಾಮದಲ್ಲಿ ಪ್ರವಾಸೋದ್ಯಮ ಅಭಿವೃದ್ಧಿಯಾಗುತ್ತಿರುವ ಹಿನ್ನೆಲೆಯಲ್ಲಿ ಭೂ ವ್ಯವಹಾರಗಳ ವಿಚಾರವೂ ಚರ್ಚೆಗೆ ಬಂದಿದೆ. ಗ್ರಾಮಸ್ಥರ ಆತಂಕದ ಹಿಂದೆ ರಿಯಲ್ ಎಸ್ಟೇಟ್ ಹಿತಾಸಕ್ತಿಗಳ ಪಾತ್ರವಿದೆಯೇ ಎಂಬ ಅನುಮಾನಗಳು ಕೆಲವರಿಂದ ವ್ಯಕ್ತವಾಗಿವೆ. ಆದರೆ, ಈ ಆರೋಪಗಳು ಅಥವಾ ಅನುಮಾನಗಳು ಸದ್ಯಕ್ಕೆ ದೃಢಪಟ್ಟಿಲ್ಲ. ಈ ಹಿನ್ನೆಲೆಯಲ್ಲಿ ಯಾವುದೇ ನಿರ್ಧಾರಕ್ಕೆ ಬರುವ ಮುನ್ನ ಆಡಳಿತದ ತನಿಖೆಯಿಂದ ವಾಸ್ತವಾಂಶ ಹೊರಬರಬೇಕಿದೆ.

ಜಿಲ್ಲಾಧಿಕಾರಿಯಿಂದ ತನಿಖೆಗೆ ಸೂಚನೆ
ಗ್ರಾಮಸ್ಥರ ಆತಂಕಕ್ಕೆ ನಿಜವಾದ ಕಾರಣವೇನು ಎಂಬುದನ್ನು ತಿಳಿದುಕೊಳ್ಳಲು ಜಿಲ್ಲಾಧಿಕಾರಿ ತನಿಖೆಗೆ ಸೂಚಿಸಿದ್ದಾರೆ ಎನ್ನಲಾಗಿದೆ. ಅಧಿಕಾರಿಗಳು ಗ್ರಾಮಸ್ಥರೊಂದಿಗೆ ಸಭೆ ನಡೆಸಿ, ಅವರ ಆತಂಕವನ್ನು ಆಲಿಸಿ ಅರಿವು ಮೂಡಿಸುವ ಪ್ರಯತ್ನ ನಡೆಸಲಿದ್ದಾರೆ.

ಮೂರು ತಲೆಮಾರುಗಳ ಬದುಕು ಬಿಟ್ಟು ವಲಸೆ
ಮೂರು ತಲೆಮಾರುಗಳಿಂದ ಬದುಕು ಕಟ್ಟಿಕೊಂಡಿದ್ದ ಗ್ರಾಮವನ್ನೇ ಭಯದ ಕಾರಣಕ್ಕೆ ಗೌಳಿ ಸಮುದಾಯದ ಕುಟುಂಬಗಳು ತೊರೆಯುತ್ತಿರುವುದು ವಿಷಾದನೀಯವಾಗಿದೆ. ಗ್ರಾಮದಲ್ಲಿ ಸಂಭವಿಸಿದ ಸಾವುಗಳಿಗೆ ನಿಜವಾದ ಕಾರಣವೇನು? ಅವುಗಳ ಹಿಂದೆ ಯಾವುದೇ ವೈಜ್ಞಾನಿಕ ಅಥವಾ ವಾಸ್ತವಿಕ ಕಾರಣವಿದೆಯೇ? ಶಾಸ್ತ್ರದ ಹೆಸರಿನಲ್ಲಿ ಜನರಲ್ಲಿ ಭಯ ಮೂಡಿಸಲಾಗಿದೆಯೇ? ಅಥವಾ ಇದರ ಹಿಂದೆ ಬೇರೆ ಯಾವುದೇ ಹಿತಾಸಕ್ತಿಗಳಿವೆಯೇ ಎಂಬ ಪ್ರಶ್ನೆಗಳಿಗೆ ತನಿಖೆಯಿಂದ ಉತ್ತರ ಸಿಗಬೇಕಿದೆ.

ಜನರ ಆತಂಕವನ್ನು ನಿವಾರಿಸಿ, ವಾಸ್ತವಾಂಶಗಳನ್ನು ಬಹಿರಂಗಪಡಿಸುವ ಮೂಲಕ ಬಾಡಗುಂದದ ಜನರಿಗೆ ತಮ್ಮ ಊರಿನಲ್ಲಿ ಮತ್ತೆ ಸುರಕ್ಷಿತವಾಗಿ ಬದುಕುವ ವಿಶ್ವಾಸ ಮೂಡಿಸುವ ಅಗತ್ಯವಿದೆ.