Laxmi News 24×7
ರಾಜಹಂಸಗಡದ ಸಾಹಸ ಕಣದಲ್ಲಿ ಭೈರೂ ನಾಯ್ಕನಿಗೆ ‘ರಾಜ’ ಮತ್ತು ಅಕ್ಷರಾ ಮಜುಕರ್ ‘ಗೆ ‘ರಾಣಿ’ಯ ಸ್ಥಾನ!
* ರಾಜಹಂಸ ಗಡದಲ್ಲಿ ಶಿವಜಯಂತಿ ಸಾಹಸ ಕ್ರೀಡೆ
* ಗಡದ ರಾಜನಾಗಿ ಮಿಂಚಿದ ಭೈರೂ ನಾಯ್ಕ
* ಅಕ್ಷರಾ ಮಜುಕರ್ ಪಾಲಿಗೆ ಗಡದ ರಾಣಿ ಪಟ್ಟ
* ಶತಾಯುಷಿಗಳ ವರೆಗೆ ನೂರಾರು ಸ್ಪರ್ಧಿಗಳ ಭಾಗವಹಿಸುವಿಕೆ
ಬೆಳಗಾವಿಯ ಐತಿಹಾಸಿಕ ರಾಜಹಂಸ ಗಡದ ತಪ್ಪಲಿನಲ್ಲಿ ಇಂದು ಶೌರ್ಯ ಮತ್ತು ಸಾಹಸದ ಪರಾಕಾಷ್ಠೆ ಕಂಡುಬಂದಿತು. ಪ್ರತಿವರ್ಷದಂತೆ ಈ ವರ್ಷವೂ ಶಿವಜಯಂತಿ ನಿಮಿತ್ತ ಆಯೋಜಿಸಲಾಗಿದ್ದ ಗಡ ಏರುವ ಸ್ಪರ್ಧೆಯು ಅತ್ಯಂತ ರೋಚಕವಾಗಿ ಜರುಗಿದ್ದು, ನೂರಾರು ಕ್ರೀಡಾಪಟುಗಳು ತಮ್ಮ ದೈಹಿಕ ಕ್ಷಮತೆಯನ್ನು ಪ್ರದರ್ಶಿಸಿದರು. ಕೇವಲ ಆರು ವರ್ಷದ ಬಾಲಕರಿಂದ ಹಿಡಿದು ಎಪ್ಪತ್ತೈದು ವರ್ಷದ ಹಿರಿಯರವರೆಗೆ ಎಲ್ಲರೂ ಸಮಾನ ಉತ್ಸಾಹದಿಂದ ಭಾಗವಹಿಸಿದ್ದು ಈ ಬಾರಿಯ ವಿಶೇಷವಾಗಿತ್ತು.
ಬೆಳಗಾವಿ ನಗರದ ಮಧ್ಯವರ್ತಿ ಸಾರ್ವಜನಿಕ ಶ್ರೀ ಶಿವಜಯಂತಿ ಉತ್ಸವ ಮಂಡಳದ ವತಿಯಿಂದ ಹಮ್ಮಿಕೊಳ್ಳಲಾಗಿದ್ದ ಐತಿಹಾಸಿಕ ರಾಜಹಂಸ ಗಡ ಏರುವ ಮತ್ತು ಇಳಿಯುವ ಸ್ಪರ್ಧೆಯು ಅತ್ಯಂತ ಸಡಗರದಿಂದ ಸಂಪನ್ನಗೊಂಡಿತು. ಮಂಡಳಿಯ ಅಧ್ಯಕ್ಷ ಅಂಕುಶ ಕೇಸರಕರ್ ಅವರು ಭಗವಾ ಧ್ವಜಾರೋಹಣ ಮಾಡುವ ಮೂಲಕ ಹಾಗೂ ಛತ್ರಪತಿ ಶಿವಾಜಿ ಮಹಾರಾಜರ ಮೂರ್ತಿಗೆ ಪೂಜೆ ಸಲ್ಲಿಸುವ ಮೂಲಕ ಈ ಸಾಹಸಮಯ ಕ್ರೀಡೆಗೆ ಚಾಲನೆ ನೀಡಿದರು. ಈ ಸಂದರ್ಭದಲ್ಲಿ ಮಾತನಾಡಿದ ಗಣ್ಯರು, ಕಳೆದ ಆರು ದಶಕಗಳಿಂದ ಈ ಸಂಪ್ರದಾಯವನ್ನು ಪಾಲಿಸಿಕೊಂಡು ಬರಲಾಗುತ್ತಿದ್ದು, ಈ ಕ್ರೀಡಾಕೂಟವು ಬೆಳಗಾವಿಯ ಕ್ರೀಡಾಪಟುಗಳಿಗೆ ರಾಷ್ಟ್ರಮಟ್ಟದ ವೇದಿಕೆ ಕಲ್ಪಿಸಲು ಪ್ರೇರಣೆಯಾಗಿದೆ ಎಂದು ಅಭಿಪ್ರಾಯಪಟ್ಟರು. ಇಡೀ ಸ್ಪರ್ಧೆಯಲ್ಲಿ ಅಪ್ರತಿಮ ವೇಗ ಮತ್ತು ಶೌರ್ಯ ಮೆರೆದ ಭೈರೂ ನಾಯ್ಕ ಅವರು ‘ರಾಜಹಂಸ ಗಡದ ರಾಜ’ ಎಂಬ ಬಿರುದನ್ನು ತನ್ನದಾಗಿಸಿಕೊಂಡರೆ, ಮಹಿಳಾ ವಿಭಾಗದಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ ಅಕ್ಷರಾ ಮಜುಕರ್ ‘ರಾಜಹಂಸ ಗಡದ ರಾಣಿ’ ಪಟ್ಟಕ್ಕೆ ಪಾತ್ರರಾದರು.
ವಿಜೇತರ ವಿವರಗಳನ್ನು ನೋಡುವುದಾದರೆ, ಎಂಟು ವರ್ಷದೊಳಗಿನ ಬಾಲಕರ ವಿಭಾಗದಲ್ಲಿ ವಂಶ ಬಿರ್ಜೆ ಹಾಗೂ ಬಾಲಕಿಯರ ವಿಭಾಗದಲ್ಲಿ ಸ್ವರಾಲಿ ಕುಡ್ತರ್ಕರ್ ಪ್ರಥಮ ಸ್ಥಾನ ಪಡೆದರು. ಹನ್ನೆರಡು ವರ್ಷದೊಳಗಿನವರಲ್ಲಿ ಕೃಷ್ಣಕುಮಾರ್ ಪೂಜೇರಿ ಮತ್ತು ಪ್ರೇರಣಾ ಪಾಟೀಲ್ ಅಗ್ರಸ್ಥಾನ ಗಳಿಸಿದರೆ, ಹದಿನಾರು ವರ್ಷದೊಳಗಿನವರ ವಿಭಾಗದಲ್ಲಿ ಅಥರ್ವ ನಾಯ್ಕ ಮತ್ತು ಶಿವಾನಿ ಶೆಲಾರ್ ವಿಜೇತರಾಗಿ ಹೊರಹೊಮ್ಮಿದರು. ಹಿರಿಯ ಸ್ಪರ್ಧಿಗಳಾದ ಸುರೇಶ್ ಸಾಂಗಾವ್ಕರ್ ಮತ್ತು ಸುರೇಶ್ ದೇವರಮನಿ ಅವರ ಉತ್ಸಾಹವು ಇಂದಿನ ಯುವ ಪೀಳಿಗೆಗೆ ಮಾದರಿಯಾಗಿತ್ತು. ಕಾರ್ಯಕ್ರಮದ ಕೊನೆಯಲ್ಲಿ ವಿಜೇತರಿಗೆ ಗೌರವಚಿಹ್ನೆ, ಪ್ರಮಾಣಪತ್ರ ಹಾಗೂ ನಗದು ಬಹುಮಾನ ನೀಡಿ ಸನ್ಮಾನಿಸಲಾಯಿತು. ಮದನ್ ಬಾಮಣೆ ಅವರು ಕಾರ್ಯಕ್ರಮದ ಸೂತ್ರಸಂಚಾಲನ ನಡೆಸಿಕೊಟ್ಟರೆ, ವಿಕಾಸ್ ಕಲ್ಘಟಗಿ ಅವರು ವಂದನಾರ್ಪಣೆ ಮಾಡಿದರು. ಈ ಸ್ಪರ್ಧೆಯು ಬೆಳಗಾವಿಯ ಶಿವಭಕ್ತರಲ್ಲಿ ಸಾಹಸ, ಆರೋಗ್ಯ ಮತ್ತು ಶಿವಪ್ರೇಮದ ಸಂಕೇತವಾಗಿ ಇತಿಹಾಸದ ಪುಟ ಸೇರಿತು.
