ಗಣಪನ ಕೊರಳೇರಲು ಸಿದ್ಧಗೊಳ್ತಿವೆ ಬಗೆಬಗೆ ಏಲಕ್ಕಿ ಮಾಲೆ

ಕಳೆದ ಹಲವು ವರ್ಷಗಳಿಂದ ಈ ಕೆಲಸದಲ್ಲಿ ತೊಡಗಿದ್ದಾರೆ. ತಾಯಿಯಿಂದ ಬಂದ ಕಲೆಯನ್ನು ಉಳಿಸಿ, ಬೆಳೆಸಿಕೊಂಡು ಬರುತ್ತಿದ್ದಾರೆ. ವಿಶಿಷ್ಠ ಏಲಕ್ಕಿ ಮಾಲೆ ತಯಾರಿಕೆಗಾಗಿ ಇವರ ತಾಯಿಗೆ ‘ಕರ್ನಾಟಕ ರಾಜ್ಯೋತ್ಸವ’ ಪ್ರಶಸ್ತಿ ಲಭಿಸಿತ್ತು.

ಉಸ್ಮಾನಸಾಬ್ ಮಾತನಾಡಿ​, “ಸಾರ್ವಜನಿಕ ಗಣೇಶೋತ್ಸವಗಳಿಗಾಗಿ ಮುಂಚಿತವಾಗಿ ಆರ್ಡರ್‌ಗಳು ಬಂದಿವೆ. ಈಗಾಗಲೇ ದೊಡ್ಡ ದೊಡ್ಡ ಮಾಲೆಗಳು ಸಿದ್ಧವಾಗಿವೆ. ಪ್ರತಿವರ್ಷ ಗಣೇಶ ಚತುರ್ಥಿ ಹತ್ತಿರವಾಗುತ್ತಿದ್ದಂತೆ ನಮಗೆ ಬೇರೆ ಕೆಲಸಗಳಲ್ಲಿ ತೊಡಗಿಸಿಕೊಳ್ಳಲಾರದಷ್ಟು ಒತ್ತಡವಿರುತ್ತದೆ. ಈ ವರ್ಷಾರಂಭದಲ್ಲಿ ಹಾವೇರಿ ನಗರದಲ್ಲಿ ಅಖಿಲ ಭಾರತ 86ನೇ ಕನ್ನಡ ಸಾಹಿತ್ಯ ಸಮ್ಮೇಳನ ನಡೆದಿತ್ತು. ಅಲ್ಲಿಯೂ ಸಹ ಏಲಕ್ಕಿ ಮಾಲೆಗಳ ಕಂಪು ಹರಡಿತ್ತು. ಸಮ್ಮೇಳನಕ್ಕಿಂತಲೂ ಅಧಿಕ ವ್ಯಾಪಾರವನ್ನು ಗಣೇಶನ ಹಬ್ಬ ಮಾಡುತ್ತಿದೆ” ಎಂದು ಸಂತಸ ವ್ಯಕ್ತಪಡಿಸಿದರು.

ಗ್ರಾಹಕ ಗುರುರಾಜ್​ ಮಾತನಾಡಿ, “ಉಸ್ಮಾನಸಾಬ್ ಏಲಕ್ಕಿ ಮಾಲೆಯ ಜತೆಗೆ ರುದ್ರಾಕ್ಷಿಮಾಲೆಗಳನ್ನೂ ಸಹ ಮಾರುತ್ತಾರೆ. ಒಂದು ಸಾರಿ ಜನರು ಇವರ ಅಂಗಡಿಗೆ ಬಂದರೆ ಸಾಕು ಖಾಯಂ ಆಗಿ ಗ್ರಾಹಕರಾಗುತ್ತಾರೆ. ಕಳೆದ ಹಲವು ವರ್ಷಗಳಿಂದ ಉಸ್ಮಾನಸಾಬ್ ಬಳಿ ಮಾಲೆಗಳನ್ನು ಖರೀದಿಸುತ್ತಿದ್ದೇನೆ. ಈ ಮಾಲೆಗಳ ಸೌಂದರ್ಯಕ್ಕೆ ಮನಸೋತಿದ್ದೇವೆ” ಎಂದು ತಿಳಿಸಿದರು.

ಕೋರಿಯರ್ ಮೂಲಕ ಏಲಕ್ಕಿ ಮಾಲೆಗಳು ಹೊರರಾಜ್ಯಗಳಿಗೂ ಮಾರಾಟವಾಗುತ್ತಿವೆ. ಕಾಸರಗೋಡು, ಕೇರಳದಿಂದ ಏಲಕ್ಕಿ ತರಿಸಲಾಗುತ್ತದೆ. ಉಳಿದ ಅಲಂಕಾರಿಕ ವಸ್ತುಗಳನ್ನು ಮುಂಬೈ ಪುಣೆಗಳಿಂದ ತರಿಸಲಾಗುತ್ತದೆ. ಈ ರೀತಿ ತಂದ ವಸ್ತುಗಳು ಮತ್ತು ಏಲಕ್ಕಿಗಳಿಂದ ಮಾಲೆ ತಯಾರಿಸಲಾಗುತ್ತದೆ.

ಈ ಹಿಂದೆ ಹಾವೇರಿಯಲ್ಲಿ ವ್ಯಾಪಾರಿಗಳು ಏಲಕ್ಕಿಯನ್ನು ಸಂಸ್ಕರಿಸಿ ಒಣಗಿಸಲು ಹಾಕುತ್ತಿದ್ದರು. ಅಂದಿನಿಂದ ಹಾವೇರಿಗೆ ಏಲಕ್ಕಿ ಕಂಪನಿ ನಗರಿ ಎಂಬ ಹೆಸರು ಬಂದಿದೆ. ಈಗ ವ್ಯಾಪಾರಿಗಳ ಸಂಖ್ಯೆ ಕಡಿಮೆಯಾಗಿದೆ. ಆದರೆ ಏಲಕ್ಕಿ ಮಾಲೆಗಳ ತಯಾರಕ ಕುಟುಂಬಗಳು ಹೆಚ್ಚಿನ ಸಂಖ್ಯೆಯಲ್ಲಿವೆ.