ಹದಿನಾರು ಚುನಾವಣೆ ಕಂಡ ಶತಾಯುಷಿ ಅಜ್ಜಿ

ಕೊಪ್ಪಳ ತಾಲೂಕಿನ ಅಗಳಕೇರಾ ಗ್ರಾಮದ ಬಸಮ್ಮ ಮಡಿವಾಳಯ್ಯ ಭೂಸನೂರಮಠ ಮೊದಲ ಚುನಾವಣೆ ಯಿಂದ ಹಿಡಿದು ಈವರೆಗಿನ ಲೋಕಸಭೆ, ವಿಧಾನಸಭೆ, ಸ್ಥಳೀಯ ಸಂಸ್ಥೆ ಹೀಗೆ ಎಲ್ಲ ಚುನಾವಣೆಗಳಲ್ಲೂ ಮತದಾನದ ಹಕ್ಕು ಚಲಾಯಿಸಿ ದಾಖಲೆ ಬರೆದಿದ್ದಾರೆ. ಇದಕ್ಕಾಗಿ ಚುನಾವಣಾ ಆಯೋಗದ ಗೌರವಕ್ಕೂ ಪಾತ್ರರಾಗಿದ್ದಾರೆ. ಬಸಮ್ಮ ಮೂಲತಃ ಕುಕನೂರು ತಾಲೂಕಿನ ಇಟಗಿ ಗ್ರಾಮದವರು. ಮದುವೆಯಾದ ಬಳಿಕ ಪತಿ ಮಡಿವಾಳಯ್ಯ ಅವರ ಊರು ಅಗಳಕೇರಾದಲ್ಲಿ ನೆಲೆಸಿ ಕೃಷಿ ಜೀವನ ನಡೆಸಿ ಕೊಂಡು ಬಂದಿದ್ದಾರೆ. ವಿಶೇಷವೆಂದರೆ ಬಸಮ್ಮ ಅನಕ್ಷರಸ್ಥೆ. ಆದಾಗ್ಯೂ ಚುನಾವಣೆ ವೇಳೆ ತಾವೂ ಮತದಾನ ಮಾಡಿ, ಇತರರಿಗೂ ಹಕ್ಕು ಚಲಾಯಿಸುವಂತೆ ಜಾಗೃತಿ ಮೂಡಿಸುತ್ತಾರೆ. ಕೊಪ್ಪಳ ಕ್ಷೇತ್ರದ ಮಟ್ಟಿಗೆ 16 ಚುನಾವಣೆಗಳನ್ನು ಕಂಡಿದ್ದಾರೆ. ಇಲ್ಲೊಂದು ಉಪ ಚುನಾವಣೆ ಎದುರಾಗಿದ್ದು, ಅದರಲ್ಲೂ ಬಸಮ್ಮ ಮತದಾನ ಮಾಡಿದ್ದಾರೆ.