ಬಿಗ್​ಬಾಸ್ ಫೀವರ್ ಶುರು​: 9ನೇ ಸೀಸನ್​ನಲ್ಲಿ ಯಾರೆಲ್ಲ ಡೊಡ್ಮನೆ ಪ್ರವೇಶಿಸಲಿದ್ದಾರೆ? ಇಲ್ಲಿದೆ ಸಂಭವನೀಯ ಪಟ್ಟಿ​.

ಭರಪೂರ ಮನರಂಜನೆಯ ಜೊತೆಗೆ ವಿವಾದಗಳನ್ನು ಹುಟ್ಟು ಹಾಕುವ ಬಿಗ್​ಬಾಸ್​, ಕಿರುತೆರೆ ಲೋಕದ ಜನಪ್ರಿಯ ಶೋಗಳಲ್ಲಿ ಒಂದೆಂದರೆ ತಪ್ಪಾಗಲಾರದು. ಪ್ರೀತಿ, ಸ್ನೇಹ ಸಂಬಂಧಗಳಿಗೆ ಈ ಶೋ ಬೆಸುಗೆಯಾಗುತ್ತದೆ. ಇಲ್ಲಿ ನಗು, ಕಣ್ಣೀರು, ಕೋಪ, ಮುನಿಸು ಮತ್ತು ಮನಸ್ತಾಪಗಳ ಮಿಶ್ರಣವು ಇದೆ. ಟಾಸ್ಕ್​ ನೀಡುವುದರ ಜೊತೆಗೆ ಜೀವನದ ಪಾಠವನ್ನು ಹೇಳಲಾಗುತ್ತದೆ. ಎಲ್ಲದಕ್ಕಿಂತ ಹೆಚ್ಚಾಗಿ ವಾರದ ಕೊನೆಯಲ್ಲಿ ಬಾದ್​ಷಾ ಕಿಚ್ಚ ಸುದೀಪರ ಪಂಚಾಯಿತಿಯಲ್ಲಿ ಸರಿ-ತಪ್ಪುಗಳ ತಿದ್ದುವಿಕೆ ಶೋಗೆ ಹೊಸ ಆಯಾಮವನ್ನು ತಂದುಕೊಡುತ್ತದೆ. ಈ ಎಲ್ಲ ಕಾರಣಗಳಿಂದ ಈ ಶೋ ವಿಶೇಷ ಎನಿಸಿಕೊಂಡಿದ್ದು, ಕಿರುತೆರೆ ಲೋಕದಲ್ಲಿ ಸಿಕ್ಕಾಪಟ್ಟೆ ಜನಪ್ರಿಯ ಪಡೆದುಕೊಂಡಿದೆ. ಈ ಶೋ ಕಲರ್ಸ್​ ಕನ್ನಡದಲ್ಲಿ ಮೂಡಿ ಬರಲಿದೆ. ಈ ಬಾರಿಯ ವಿಶೇಷ ಏನೆಂದರೆ, ಟಿವಿ ಮತ್ತು ಒಟಿಟಿಯಲ್ಲಿ ಎರಡು ಕಡೆ ಪ್ರದರ್ಶನವಾಗಲಿದೆ. ಎರಡೂ ಕಡೆ ಕಿಚ್ಚನದ್ದೇ ನಿರೂಪಣೆ ಇರಲಿದೆ.

ಈಗಾಗಲೇ 8 ಆವೃತ್ತಿ ಮುಗಿಸಿದ್ದು, 9ನೇ ಆವೃತ್ತಿ ಯಾವಾಗ? ಎಂಬ ಬಹುತೇಕರ ಪ್ರಶ್ನೆಗೆ ಈಗಾಗಲೇ ಉತ್ತರ ಸಿಕ್ಕಿದೆ. ದಿನಾಂಕ ಘೋಷಣೆಯಾಗಿಲ್ಲದಿದ್ದರೂ ಇನ್ನೂ ಕೆಲವೇ ದಿನಗಳಲ್ಲಿ ಶೋ ಆರಂಭವಾಗಲಿದೆ ಎಂದು ಹೇಳಲಾಗುತ್ತಿದೆ. ಅದಕ್ಕೆ ಪುಷ್ಠಿ ನೀಡುವಂತೆ ಈಗಾಗಲೇ ಕಿಚ್ಚ ಸುದೀಪ್​ ಅವರು ಬಿಗ್​ಬಾಸ್​ ಪ್ರೋಮೋ ಶೂಟ್​ನಲ್ಲಿ ಭಾಗಿಯಾಗಿ ಬಂದಿದ್ದಾರೆ. ಅದಕ್ಕೆ ಸಂಬಂಧಿಸಿದ ಫೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು, ನಿನ್ನೆ ಬಿಬಿಕೆ9 (#BBK9) ಹ್ಯಾಷ್​ಟ್ಯಾಗ್​ ಟ್ವಿಟರ್​ನಲ್ಲಿ ಟ್ರೆಂಡಿಂಗ್​ನಲ್ಲಿಯೂ ಇತ್ತು. ಅಲ್ಲದೆ, ಈಗಾಗಲೇ ಬಿಗ್​ಬಾಸ್​ ಕನ್ನಡ 9 ಹೆಸರಿನಲ್ಲಿ ಕಲರ್ಸ್​ ಕನ್ನಡ ಟ್ವಿಟರ್​ ಖಾತೆಯನ್ನೂ ತೆರೆದಿದೆ.

ಒಂದು ಮೂಲಗಳ ಪ್ರಕಾರ ಬಿಗ್​ಬಾಸ್​ ಶೋ ಆಗಸ್ಟ್​ ತಿಂಗಳ ಕೊನೆ ಅಥವಾ ಸೆಪ್ಟೆಂಬರ್​ ತಿಂಗಳಲ್ಲಿ ಆರಂಭವಾಗಲಿದೆ ಎಂದು ಹೇಳಲಾಗುತ್ತಿದೆ. ಆದರೆ, ಖಚಿತವಾಗಿ ಇನ್ನು ತಿಳಿದಿಲ್ಲ. ಪ್ರೋಮೋ ಬಂದ ಬಳಿಕ ಎಲ್ಲವೂ ಗೊತ್ತಾಗಲಿದೆ. ಒಟ್ಟಿನಲ್ಲಿ ಬಿಗ್​ಬಾಸ್ ಶುರುವಾಗುವುದಂತೂ ಖಂಡಿತ. ಇಷ್ಟೆಲ್ಲ ಹೇಳಿದ ಬಳಿಕ ನಿಮ್ಮ ತಲೆಗೆ ಬರುವ ಮೊದಲ ಪ್ರಶ್ನೆಯೆಂದರೆ, ಈ ಬಾರಿ ಬಿಗ್​ಬಾಸ್​ನಲ್ಲಿ ಯಾರೆಲ್ಲ ಇರಲಿದ್ದಾರೆ ಎಂಬುದು. ಅದಕ್ಕೆ ಉತ್ತರ ಮುಂದಿದೆ ಓದಿ. ಈ ಬಾರಿ ಒಳ್ಳೊಳ್ಳೆ ಸ್ಪರ್ಧಿಗಳನ್ನು ದೊಡ್ಮನೆಯೊಳಗೆ ಕಳಹಿಸಲು ಬಿಗ್​ಬಾಸ್​ ತಂಡ ಪ್ಲಾನ್​ ಮಾಡಿಕೊಂಡಿದೆ. ಸಾಮಾಜಿಕ ಜಾಲತಾಣದಲ್ಲಿ ಈಗಾಗಲೇ ಕೆಲವರ ಹೆಸರು ಓಡಾಡುತ್ತಿದೆ. ವದಂತಿಗಳ ಪ್ರಕಾರ ಈ ಬಾರಿ ಬಿಗ್​ಬಾಸ್​ ಮನೆ ಪ್ರವೇಶಿಸಲಿರುವ ಸಂಭವನೀಯ ಅಭ್ಯರ್ಥಿಗಳ ಪಟ್ಟಿ ಈ ಕೆಳಕಂಡಂತಿದೆ…

1. ಚಂದನ್ ಶರ್ಮಾ
ಚಂದನ್ ಶರ್ಮಾ ಅವರು ವೃತ್ತಿಪರ ಸುದ್ದಿ ನಿರೂಪಕ ಹಾಗೂ ಕಿರಿಯ ಕಾರ್ಯನಿರ್ವಾಹಕ ಸಂಪಾದಕ. ಅಲ್ಲದೆ, ಇವರಿಗೆ ಹಾಸ್ಯ ಪ್ರಜ್ಞೆಯು ಚೆನ್ನಾಗಿದ್ದು, ಈ ಬಾರಿ ಬಿಗ್​ಬಾಸ್​ ಮನೆ ಪ್ರವೇಶಿಸಲಿದ್ದಾರೆ ಎಂದು ಹೇಳಲಾಗುತ್ತಿದೆ.

2. ವಿನಯ್​ ಕುಮಾರ್​
ವಿನಯ್​ ಕುಮಾರ್​ ಅವರು ಟೀಮ್​ ಇಂಡಿಯಾದ ಮಾಜಿ ಆಟಗಾರ. ಅನೇಕ ಏಕದಿನ ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಮತ್ತು ಇಪ್ಪತ್ತು ಟಿ20 ಪಂದ್ಯಗಳಲ್ಲಿ ದೇಶವನ್ನು ಪ್ರತಿನಿಧಿಸಿದ್ದಾರೆ. ಇವರನ್ನು ಧಾರವಾಡದ ಎಕ್ಸ್​ಪ್ರೆಸ್​ ಅಂತಲೂ ಕರೆಯುತ್ತಾರೆ.

3. ನವೀನ್​ ಕೃಷ್ಣ
ನವೀನ್​ ಕೃಷ್ಣ ಓರ್ವ ಕನ್ನಡದ ಕಲಾವಿದ, ಬರಹಗಾರ ಮತ್ತು ನಿರ್ದೇಶಕ. ಹಿರಿಯ ನಟ ಶ್ರೀನಿವಾಸ್​ ಮೂರ್ತಿ ಅವರ ಪುತ್ರ.

4. ಟೆನ್ನಿಸ್​ ಕೃಷ್ಣ
ಕನ್ನಡ ಚಿತ್ರರಂಗದ ಹಿರಿಯ ಹಾಸ್ಯ ನಟರಾಗಿರುವ ಟೆನ್ನಿಸ್​ ಕೃಷ್ಣ ಈ ಬಾರಿ ಬಿಗ್​ಬಾಸ್​ ಮನೆ ಪ್ರವೇಶಿಸುವ ಸಾಧ್ಯತೆ ಇದೆ. ಸದ್ಯ ಸಿನಿಮಾ ಅವಕಾಶಗಳ ಕೊರತೆ ಎದುರಿಸುತ್ತಿರುವ ಟೆನ್ನಿಸ್​ ಕೃಷ್ಣ ಅವರಿಗೆ ಬಿಗ್​ಬಾಸ್​ ಸೂಕ್ತ ಸಮಯದಲ್ಲಿ ಸೂಕ್ತ ವೇದಿಕೆ ಎನ್ನಲಾಗುತ್ತಿದೆ. ಒಂದು ವೇಳೆ ಟೆನ್ನಿಸ್​ ಕೃಷ್ಣ ಅವರು ಬಿಗ್​ಬಾಸ್​ ಮನೆ ಪ್ರವೇಶಿಸಿದ್ದಲ್ಲಿ ಮನೆರಂಜನೆಗಂತೂ ಕೊರತೆ ಇರುವುದಿಲ್ಲ.

5. ಆಶಾ ಭಟ್​
ಆಶಾ ಭಟ್ ಭಾರತೀಯ ಗಾಯಕಿಯಾಗಿದ್ದು, ಚಿಕ್ಕ ವಯಸ್ಸಿನಲ್ಲಿಯೇ ಜನಪ್ರಿಯತೆಯನ್ನು ಗಳಿಸಿದ್ದಾರೆ. ಜೀ ಕನ್ನಡದ ಸರಿಗಮಪದಲ್ಲಿ ಭಾಗವಹಿಸಿದ್ದಾರೆ. ಈ ಕಾರ್ಯಕ್ರಮದ ಸೀಸನ್ 17ರ ಸೆಮಿ ಫೈನಲಿಸ್ಟ್ ಆಗಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ ಸಾಕಷ್ಟು ಅಭಿಮಾನಿಗಳನ್ನು ಹೊಂದಿದ್ದಾರೆ.

6. ರವಿ ಶ್ರೀವಾತ್ಸವ
ರವಿ ಶ್ರೀವಾತ್ಸವ ಕನ್ನಡದ ಪ್ರಖ್ಯಾತ ನಿರ್ದೇಶಕ. ಗಂಡ ಹೆಂಡತಿ, ಡೆಡ್ಲಿ ಸೋಮದಂತಹ ಯಶಸ್ವಿ ಸಿನಿಮಾಗಳ ನಿರ್ದೇಶನ ಮಾಡಿದ್ದಾರೆ.

7. ತರುಣ್​ ಚಂದ್ರ
ನಟ ತರುಣ್​ ಚಂದ್ರ ಎಲ್ಲರಿಗೂ ಪರಿಚಿತರಾಗಿರುವ ಸ್ಪುರದ್ರೂಪಿ ನಟ. 2003ರಲ್ಲಿ ಖುಷಿ ಸಿನಿಮಾ ಮೂಲಕ ಕನ್ನಡ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದರು. ಲವ್​ ಗುರು, ಗಾನ ಬಜಾನ ಸೇರಿದಂತೆ ಅನೇಕ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಸೆಲೆಬ್ರಿಟಿ ಕ್ರಿಕೆಟ್​ ಲೀಗ್​ (ಸಿಸಿಎಲ್​)ನಲ್ಲಿ ಕರ್ನಾಟಕ ಬುಲ್ಡೋಜರ್ಸ್​ ತಂಡದಲ್ಲಿ ಆಡಿದ್ದಾರೆ.

8. ನಮ್ರತಾ ಗೌಡ
ನಮ್ರತಾ ಗೌಡ ಖ್ಯಾತ ಕಿರುತೆರೆ ಕಲಾವಿದೆ. ಕೆಲ ಧಾರವಾಹಿಗಳಲ್ಲಿ ನಮ್ರತಾ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಅದರಲ್ಲೂ ನಾಗಿನಿ 2 ಧಾರವಾಹಿಯಲ್ಲಿ ತಮ್ಮ ಅದ್ಭುತ ನಟನೆ ಮೂಲಕ ಜನಮನ್ನಣೆ ಗಳಿಸಿದ್ದಾರೆ.

9. ರೇಖಾ ವೇದವ್ಯಾಸ್​
ನಟಿ ರೇಖಾ ವೇದವ್ಯಾಸ್​ ಕನ್ನಡಿಗರಿ ಚಿರಪರಿಚಿತರಾಗಿದ್ದಾರೆ. ಏಕೆಂದರೆ, ಕಿಚ್ಚ ಸುದೀಪ್​ಸಿನಿ ಕೆರಿಯರ್​ನಲ್ಲಿ ದೊಡ್ಡ ಯಶಸ್ಸು ತಂದುಕೊಟ್ಟ ಹುಚ್ಚ ಸಿನಿಮಾದಲ್ಲಿ ನಾಯಕಿಯಾಗಿ ನಟಿಸಿದ್ದಾರೆ. ಕನ್ನಡದ ಸಾಕಷ್ಟು ಸಿನಿಮಾಗಳಲ್ಲಿ ರೇಖಾ ನಟಿಸಿದ್ದಾರೆ. ತಮಿಳು ಮತ್ತು ತೆಲುಗು ಸಿನಿಮಾಗಳಲ್ಲಿಯೂ ಬಣ್ಣ ಹಚ್ಚಿದ್ದಾರೆ.

10. ಭೂಮಿಕ ಬಸವರಾಜ್​
ಸಾಮಾಜಿಕ ಜಾಲತಾಣವನ್ನು ಹೆಚ್ಚಾಗಿ ಬಳಸುವವರು ಅಥವಾ ಇನ್​ಸ್ಟಾಗ್ರಾಂ ರೀಲ್ಸ್​ ನೋಡುವವರಿಗೆ ಭೂಮಿಕ ಬಸವರಾಜ್​ ಚೆನ್ನಾಗಿ ತಿಳಿದಿರುತ್ತದೆ. ತಮ್ಮ ಅದ್ಭುತ ಹಾಗೂ ಹಾಟ್​ ಡಾನ್ಸ್​ ಮೂಲಕವೇ ಭೂಮಿಕಾ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ಫಾಲೋವರ್ಸ್​ ಹೊಂದಿದ್ದಾರೆ.

11. ಪ್ರೇಮಾ
ನಟಿ ಪ್ರೇಮಾ ಯಾರಿಗೆ ತಾನೆ ಗೊತ್ತಿಲ್ಲ. ತುಂಬಾ ವರ್ಷಗಳ ಬಳಿಕ ಮತ್ತೆ ಸಿನಿಮಾ ಲೋಕದಲ್ಲಿ ಸಕ್ರಿಯರಾಗಿರುವ ಪ್ರೇಮಾ ಕೆಲವೊಂದಿಷ್ಟು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಅದರಲ್ಲಿ ವೆಡ್ಡಿಂಗ್​ ಗಿಫ್ಟ್​ ಕೂಡ ಒಂದು. ಓಂ, ಯಜಮಾನದಂತಹ ಬ್ಲಾಕ್​ ಬಸ್ಟರ್​ ಸಿನಿಮಾ ಕೊಟ್ಟ ಪ್ರೇಮಾ ಅವರು ಬಿಗ್​ಬಾಸ್​ ಮನೆ ಪ್ರವೇಶಿಸುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ.

12. ಮಿಮಿಕ್ರಿ ಗೋಪಿ
ಗೋಪಿ ಅವರ ಹಾಸ್ಯ, ಮಿಮಿಕ್ರಿ ಮತ್ತು ನಗು ತರಿಸುವ ಒನ್-ಲೈನ್ ಡೈಲಾಗ್‌ಗಳಿಂದ ಜನಪ್ರಿಯರಾಗಿದ್ದಾರೆ.

13. ದಿಲೀಪ್​ ರಾಜ್​
ದಿಲೀಪ್ ರಾಜ್ ಕನ್ನಡ ಮನರಂಜನಾ ಉದ್ಯಮದ ಯಶಸ್ವಿ ನಟ, ನಿರ್ಮಾಪಕ ಮತ್ತು ಕಿರುತೆರೆ ನಿರ್ದೇಶಕ.

14. ಆರ್ಯವರ್ಧನ್​ ಗುರೂಜಿ
ಆರ್ಯವರ್ಧನ್​ ಗುರೂಜಿ ಕನ್ನಡ ಟೆಲಿವಿಷನ್​ ಉದ್ಯಮದಲ್ಲಿ ಪ್ರಧಾನವಾಗಿ ಕೆಲಸ ಮಾಡುವ ಗುರೂಜಿ ಆಗಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ ಆಗಾಗ ಸಿಕ್ಕಾಪಟ್ಟೆ ಟ್ರೋಲ್​ ಆಗುತ್ತಿರುತ್ತಾರೆ.

ಈ ಮೇಲಿನ ಎಲ್ಲ ಸ್ಪರ್ಧಿಗಳು ಸಂಭವನೀಯ ಸ್ಪರ್ಧಿಗಳಷ್ಟೇ. ಸಾಮಾಜಿಕ ಜಾಲತಾಣದಲ್ಲಿ ಈ ಹೆಸರುಗಳು ಹೆಚ್ಚಾಗಿ ಕೇಳಿಬರುತ್ತಿರುವುದರಿಂದ ಈ ಬಾರಿ ಬಿಗ್​ಬಾಸ್​ ಮನೆಯೊಳಗೆ ಇವರುಗಳು ಪ್ರವೇಶಿಸಬಹುದು ಎಂದು ಊಹಿಸಲಾಗಿದೆ. ಆದರೆ, ಮನೆಯೊಳಗೆ ಯಾರು ಪ್ರವೇಶಿಸಲಿದ್ದಾರೆ ಎಂಬುದು ಗೊತ್ತಾಗುವುದು ಶೋ ಪ್ರಾರಂಭವಾದಾಗ ಮಾತ್ರ. ಹೀಗಾಗಿ ಅಲ್ಲಿಯವರೆಗೆ ಕಾಯಲೇಬೇಕಿದೆ.