ಅಧಿವೇಶನದಲ್ಲಿ ಸ್ವಪಕ್ಷವನ್ನೇ ಇಕ್ಕಟ್ಟಿಗೆ ಸಿಲುಕಿಸಿದ ಶಾಸಕ ಯತ್ನಾಳ್

ಕುಮಾರಸ್ವಾಮಿ ಸರ್ಕಾರ ಇದ್ದಾಗ 105 ಕೋಟಿ ರೂಪಾಯಿ ನೀಡಿದ್ದರು ಆದರೆ ಆ ಅನುದಾನವನ್ನು ಬಿಜೆಪಿ ಅಧಿಕಾರಕ್ಕೆ ಬಂದಾಗ ರದ್ದು ಮಾಡಿತ್ತು . ಪಿಎಸಿಗೆ ಸಿ ಸಿ ಪಾಟೀಲ್‌ ಅಧ್ಯಕ್ಷರನ್ನಾಗಿ ಮಾಡಿ ಪಂಚಮಸಾಲಿ ಸಮುದಾಯವನ್ನು ಸಮಧಾನಪಡಿಸಲು ಹೊರಟಿದೆ ಎಂದು ಹೇಳಿದರು. ಕೆಲವರು ಹೇಳ್ತಾರೆ, ಯತ್ನಾಳ್‌ರೇ ನಿಮ್ಮ ಬಾಯಿ ಸರಿ ಇದ್ದಿದ್ದರೆ ನೀವು ಸಿಎಂ ಆಗ್ತಿದ್ರೀ ಅಂತ, ಆದರೆ ನಾನು ಯಾವಾಗಲೂ ನೇರವಾಗಿ ಹೇಳ್ತೇನೆ , ಯಾರಿಗೂ ಹೆದರುವುದಿಲ್ಲ ಎಂದು ಕಲಾಪದ ವೇಳೆ ಹೇಳಿದರು.

ಬೊಮ್ಮಾಯಿ, ಬೈರತಿ ಬಸವರಾಜ್‌ ಅನುದಾನ ನೀಡಿ ನೆರವಾದರು, ನಾನು ಟಾರ್ಗೆಟ್ ಮಾಡಿದ್ರೆ ಮಾಜಿ ಆಗುವವರೆಗೂ ಬಿಡುವುದಿಲ್ಲ ಎಂದು ಯತ್ನಾಳ್ ಹೇಳಿದ್ದರು. ಈ ವೇಳೆ ಮಾತನಾಡಿದ ಕಾಗವಾಡ ಶಾಸಕ ರಾಜು ಕಾಗೆ , ನಿಮ್ಮ ಸಹಾಯಕ್ಕೆ ಬರುತ್ತೇನೆ ಎಂದು ಎದ್ದು ನಿಂತರು ತಕ್ಷಣ ಪ್ರತಿಕ್ರಯಿಸಿದ ಯತ್ನಾಳ್‌, ನನ್ನ ಸಹಾಯಕ್ಕೆ ಯಾರೂ ಬೇಡ ನಾನು ಒಂಟಿ ಸಲಗ ಎಂದು ಹೇಳಿದರು. ಮಾತುಕತೆ ಮಧ್ಯೆ ಎದ್ದು ನಿಂತ ಶಾಸಕ ಅಬ್ಬಯ್ಯ ಪ್ರಸಾದ್ , ನಿಮ್ಮ ಜೊತೆ ಬಿಜೆಪಿಯವರು ಯಾರೂ ಇಲ್ವಾ ಎಂದು ಕೆಣಕಿದರು, ಇಲ್ಲಾ ಅಂತಾನೇ ಅಂದುಕೊಳ್ಳಿ ಎಂದು ನೇರವಾಗಿಯೇ ಯತ್ನಾಳ್‌ ಹೇಳಿದ್ದು ಬಿಜೆಪಿ ನಾಯಕರಿಗೆ ಮುಜುಗರ ಉಂಟುಮಾಡಿದೆ.