ರಾಷ್ಟ್ರೀಯ ಹೆದ್ದಾರಿಗಳ ಟೋಲ್​ ದರ ರಾಜ್ಯದಲ್ಲಿ ಏಪ್ರಿಲ್​ 1ರಿಂದ ಹೆಚ್ಚಲಿದೆ.

ಬೆಂಗಳೂರು: ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವನ್ನು ಸಂಪರ್ಕಿಸುವ ಬಳ್ಳಾರಿ ರಸ್ತೆಯಲ್ಲಿ ಏಪ್ರಿಲ್​ 1ರಿಂದ ಸಾಗುವ ಪ್ರಯಾಣಿಕರಿಗೆ ಟೋಲ್​ ದರದ ಬಿಸಿ ಮುಟ್ಟಲಿದೆ. ಏಪ್ರಿಲ್​ 1ರಿಂದ ಪರಿಷ್ಕೃತ ಟೋಲ್​ ದರ ಜಾರಿ ಮಾಡುವ ಕುರಿತು ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ಘೋಷಣೆ ಮಾಡಿದ್ದು, ಏಕಮುಖ ಸಂಚಾರದ ದರ ಕಾರಿಗೆ 115ರಿಂದ 120 ರೂ ಆಗಲಿದೆ. ದ್ವಿಮುಖ ಸಂಚಾರ ದರ 170ರಿಂದ 180 ಆಗಲಿದೆ.

ಹಣದುಬ್ಬರದ ಹಿನ್ನೆಲೆಯಲ್ಲಿ ವಾರ್ಷಿಕವಾಗಿ ನಡೆಸುವ ದರ ಹೆಚ್ಚಳದ ಅನುಸಾರವಾಗಿ ಈ ದರ ನಿಗದಿಯಾಗಿದ್ದು, ಕರ್ನಾಟಕದ ಟೋಲ್​ ಮಾತ್ರವಲ್ಲದೇ, ದೇಶದ ಎಲ್ಲಾ ಎನ್​ಎಚ್​ಎಐ ಟೋಲ್​ಗಳಲ್ಲೂ ದರ ಏರಿಕೆಯಾಗಲಿದೆ.

ಎನ್​ಎಚ್​ಎಐ ಪ್ರಾಜೆಕ್ಟ್​​ ನಿರ್ದೇಶಕ ಕೆ.ಬಿ.ಜಯಕುಮಾರ್​ ಮಾತನಾಡಿ, “ಈ ದರ ನಿಗದಿತ ಟೋಲ್​ ಪ್ಲಾಜಾ ಮತ್ತು ರಿಯಾಯಿತಿ ಅವಧಿ ಆಧಾರದ ಮೇಲೆ ಶೇ 3ರಿಂದ ಶೇ 5ರಷ್ಟು ಏರಿಕೆ ಕಾಣಲಿದೆ. ಮುಂದಿನ ದಿನದಲ್ಲಿ ಈ ಪರಿಷ್ಕೃತ ದರ ಏರಿಕೆಯನ್ನು ಪ್ರಕಟಿಸಲಾಗುವುದು” ಎಂದಿದ್ದಾರೆ.

ಪ್ರಯಾಣಿಕರು ಮತ್ತು ವಾಹನಗಳ ಮೇಲೆ ಪರಿಣಾಮ: ಬಳ್ಳಾರಿ ಟೋಲ್​ ದರ ಹೆಚ್ಚಳವು ಖಾಸಗಿ ವಾಹನ ಮಾಲೀಕರು, ವಿಮಾನ ಪ್ರಯಾಣ ನಡೆಸುವ ಟ್ಯಾಕ್ಸಿ ಹಾಗೂ ವಿಮಾನ ನಿಲ್ದಾಣಕ್ಕೆ ಪ್ರಯಾಣ ಬೆಳೆಸುವ ಸಿಟಿ ಬಸ್​ ಮತ್ತು ಎಸಿ ಬಸ್​ ಪ್ರಯಾಣಿಕರ ಮೇಲೆ ಪರಿಣಾಮ ಬೀರಲಿದೆ. ಈ ಟೋಲ್​ನಲ್ಲಿ ದಿನವೊಂದಕ್ಕೆ ಸರಾಸರಿ 80 ಸಾವಿರದಿಂದ 1 ಲಕ್ಷ ವಾಹನಗಳು ಪ್ರಯಾಣಿಸುತ್ತಿದ್ದು, ಬೆಂಗಳೂರಿನ ಬ್ಯುಸಿ ರಸ್ತೆ ಮಾರ್ಗಗಳಲ್ಲಿ ಇದು ಒಂದಾಗಿದೆ.