ವಿಶ್ವಕಪ್​ ಸರಣಿಯ ಸೆಮೀಸ್​ನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ 3 ವಿಕೆಟ್​ಗಳ ಗೆಲುವು ದಾಖಲಿಸಿದ ಆಸ್ಟ್ರೇಲಿಯಾ ಫೈನಲ್

ಕೋಲ್ಕತ್ತಾದ ಈಡನ್​ ಗಾರ್ಡನ್ಸ್​ ಕ್ರೀಡಾಂಗಣದಲ್ಲಿ ನಡೆದ, ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ನೀಡಿದ 213ರನ್​ಗಳ ಗುರಿ ಬೆನ್ನಟ್ಟಿದ ಆಸೀಸ್ ಟ್ರಾವಿಸ್​ ಹೆಡ್​ (69), ಸ್ಟಿವೆನ್ ಸ್ಮಿತ್​ (30), ಜೋಶ್​ ಇಂಗ್ಲಿಸ್​ (28) ಬ್ಯಾಟಿಂಗ್​ ನೆರವಿನಿಂದ 47.2 ಓವರ್​ಗಳಲ್ಲಿ ಗುರಿಯನ್ನು ತಲುಪುವ ಮೂಲಕ 3 ವಿಕೆಟ್​ಗಳ ಗೆಲುವು ದಾಖಲಿಸಿದೆ. ಈ ಮೂಲಕ ವಿಶ್ವಕಪ್​ ಸಮರದಲ್ಲಿ ಆಸೀಸ್​ 8ನೇ ಬಾರಿಗೆ ಫೈನಲ್​ ಪ್ರವೇಶ ಮಾಡಿದೆ.

ಇದಕ್ಕೂ ಮೊದಲು ಟಾಸ್​ ಗೆದ್ದು ಮೊದಲು ಬ್ಯಾಟ್​ ಮಾಡಿದ ಹರಿಣ ಪಡೆ ಡೆವಿಡ್​ ಮಿಲ್ಲರ್​ ಶತಕದ ನೆರವಿನಿಂದ 49.4 ಓವರಗಳ ಅಂತ್ಯಕ್ಕೆ ತನ್ನೆಲ್ಲ ವಿಕೆಟ್​ಗಳನ್ನು ಕಳೆದುಕೊಂಡು 212 ರನ್​ಗಳನ್ನು ಕಲೆ ಹಾಕಿ ಕಾಂಗರೂ ಪಡೆಗೆ ಸಾಧಾರಣ ಗುರಿ ನೀಡಿತ್ತು.

ಆಸೀಸ್​ನ ಮಾರಕ ಬೌಲಿಂಗ್​ ದಾಳಿಗೆ ಸಿಲುಕಿದ ದಕ್ಷಿಣ ಆಫ್ರಿಕಾ ಕೇವಲ 24 ರನ್​ಗಳಿಗೆ ತನ್ನ ಪ್ರಮುಖ ನಾಲ್ಕು ವಿಕೆಟ್​ಗಳನ್ನು ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ಆರಂಭಿಕ ಬ್ಯಾಟರ್​ಗಳಾದ ಕ್ವಿಂಟನ್ ಡಿ ಕಾಕ್(3), ಟೆಂಬಾ ಬವುಮಾ, ರಾಸ್ಸಿ ವ್ಯಾನ್ ಡೆರ್ ಡಸ್ಸೆನ್ (6), ಐಡೆನ್ ಮಾರ್ಕ್ರಾಮ್ (10) ಒಬ್ಬರಹಿಂದೊಬ್ಬರಂತೆ ವಿಕೆಟ್​ಗಳನ್ನು ಒಪ್ಪಿಸಿ ಪೆವಿಲಿಯನ್​ ಸೇರಿದರು. ಮತ್ತೊಂದೆಡೆ ಉತ್ತಮ ಪ್ರದರ್ಶನ ನೀಡುತ್ತಿದ್ದ ಹೆನ್ರಿಚ್​​ ಕ್ಲಾಸೇನ್(47) ಟ್ರಾವಿಸ್​ ಹೆಡ್​ ಎಸೆತದಲ್ಲಿ ಬೌಲ್ಡ್​ ಆಗುವ ಮೂಲಕ ಹರಿಣ ಪಡೆ ಮತ್ತೊಮ್ಮೆ ಆಘಾತಕ್ಕೊಳಗಾಯಿತು.

ಈ ವೇಳೆ ತಂಡಕ್ಕೆ ಆಪದ್ಬಾಂಧವ ಆದ ಡೇವಿಡ್​ ಮಿಲ್ಲರ್​(101) ಆಸೀಸ್​ ಬೌಲರ್​ ದಾಳಿಯನ್ನು ಸಮರ್ಥವಾಗಿ ಎದುರಿಸಿ ಭರ್ಜರಿ ಶತಕ ಸಿಡಿಸಿದರು. ಈ ಮೂಲಕ ಹರಿಣ ಪಡೆ 212 ರನ್​ಗಳ ಕಲೆ ಹಾಕಿತು. ಆಸ್ಟೇಲಿಯಾ ಪರ ಮಿಚೆಲ್ ಸ್ಟಾರ್ಕ್, ಪ್ಯಾಟ್ ಕಮ್ಮಿನ್ಸ್ ತಲಾ 3, ಟ್ರಾವಿಸ್ ಹೆಡ್, ಜೋಶ್ ಹ್ಯಾಜಲ್‌ವುಡ್ ತಲಾ 2 ವಿಕೆಟ್​ ಪಡೆದು ಮಿಂಚಿದರು.

ಭಾನುವಾರ ಭಾರತದ ಮತ್ತು ಆಸ್ಟ್ರೇಲಿಯಾ ನಡುವಿನ ವಿಶ್ವಕಪ್​ ಸಮರದ ಫೈನಲ್​ ಪಂದ್ಯ ಅಹಮದಾಬಾದ್​ನ ನರೇಂದ್ರ ಮೋದಿ ಮೈದಾನದಲ್ಲಿ ನಡೆಯಲಿದೆ.

ವಿಶ್ವಕಪ್​ ಫೈನಲ್​ಗೆ ಹೆಚ್ಚು ಬಾರಿ ಎಂಟ್ರಿಕೊಟ್ಟ ತಂಡಗಳು

• ಆಸ್ಟ್ರೇಲಿಯಾ – 8
• ಭಾರತ – 4
• ಇಂಗ್ಲೆಂಡ್​ – 4
• ವೆಸ್ಟ್​ ಇಂಡೀಸ್​ – 3
• ಶ್ರೀಲಂಕಾ – 3

ವಿಶ್ವಕಪ್​ ಆವೃತ್ತಿಯೊಂದರಲ್ಲೇ ಅತಿ ಹೆಚ್ಚು ಗೆಲುವು ದಾಖಲಿಸಿದ ತಂಡಗಳು

• 11 – ಆಸ್ಟ್ರೇಲಿಯಾ (2003)
• 11 – ಆಸ್ಟ್ರೇಲಿಯಾ (2007)
• 10 – ಭಾರತ (2023)
• 9 – ಭಾರತ (2003)
• 8 – ಶ್ರೀಲಂಕಾ (2007)
• 8 – ನ್ಯೂಜಿಲೆಂಡ್ (2015)
• 8 – ಆಸ್ಟ್ರೇಲಿಯಾ (2023)