ಥಂಡಾ ಹೊಡೆದ ‘ಕೈ’ ಹೈಕಮಾಂಡ್​; ಸ್ವಪಕ್ಷದವ್ರಿಂದಲೇ ನಾಯಕತ್ವದ ವಿರುದ್ಧ ಕಿಡಿ..!

ಭಾರೀ ಕುತೂಹಲ ಕೆರಳಿಸಿದ್ದ ಪಂಚರಾಜ್ಯ ಚುನಾವಣೆ ರಿಸಲ್ಟ್​ ಹೊರಬಿದ್ದಿದೆ. ಎಲೆಕ್ಷನ್​ನಲ್ಲಿ ಕಮಲ ಕಮಾಲ್​ ಮಾಡಿದ್ರೆ ಕಾಂಗ್ರೆಸ್​ನ ಥಂಡಾ ಹೊಡೆದಿದೆ. ಈ ನಡುವೆ ಕೇಸರಿ ಕಲಿಗಳು ಸಿಂಹಾನಸವೇರಲು ಸಿದ್ಧತೆ ಮಾಡಿಕೊಂಡಿದ್ದರೆ ಕೈ ನಾಯಕರು ಆತ್ಮವಿಮರ್ಶೆಗೆ ಮುಂದಾಗಿದ್ದಾರೆ.

ಪಂಚರಾಜ್ಯಗಳ ಚುನಾವಣೆಯಲ್ಲಿ ಕಮಲ ಪಾಳಯ ಅಕ್ಷಶರಃ ಕಮಾಲ್​ ಮಾಡಿದೆ. ಪಂಜಾಬ್​ನಲ್ಲಿ ಆಪ್​ ಕೈಯನ್ನು ಗುಡಿಸಿ ಗುಂಡಾಂತರ ಮಾಡಿದ್ದು ಕಾಂಗ್ರೆಸ್ ಧೂಳಿಪಟವಾಗಿದೆ. ಇದು ಹಸ್ತ ಪಡೆಗೆ ಇನ್ನಿಲ್ಲದ ಮುಜುಗರವನ್ನುಂಟು ಮಾಡಿದೆ. ಪಂಚರಾಜ್ಯ ಚುನಾವಣೆಯಲ್ಲಿ ಕಾಂಗ್ರೆಸ್‌ ಹೀನಾಯ ಪ್ರದರ್ಶನ ಬೆನ್ನಲ್ಲೇ ಸ್ವಪಕ್ಷದವರೇ ಕಾಂಗ್ರೆಸ್​ ನಾಯಕತ್ವದ ವಿರುದ್ಧ ಸಿಡಿದೆದ್ದಿದ್ದು ನಾಯಕತ್ವ ಬದಲಾವಣೆ ವಿಚಾರ ಮತ್ತೆ ಮುನ್ನೆಲೆಗೆ ಬಂದಿದೆ.

ಕಾಂಗ್ರೆಸ್​ ಹೈಕಮಾಂಡ್​ ವಿರುದ್ಧವೇ ಜಿ-23 ಗುಟುರು
ಕಾಂಗ್ರೆಸ್​ ಹೀನಾಯ ಸೋಲು ಪಕ್ಷದೊಳಗಿನ ಜಿ-23 ತಂಡ ಆಯಕ್ಟೀವ್​​​ ಆಗಿದೆ. ಪಂಜಾಬ್​​​ನ ಬೆಳವಣಿಗೆ ಬಗ್ಗೆ ಅಸಮಾಧಾನ ಹೊರಹಾಕಿದೆ. ದೆಹಲಿಯ ಗುಲಾಂ ನಬಿ ಆಜಾದ್‌ ನಿವಾಸದಲ್ಲಿ ಸಭೆ ನಡೆದಿದ್ದು, ಸಭೆಯಲ್ಲಿ ಕಪಿಲ್ ಸಿಬಲ್, ಮನೀಶ್ ತಿವಾರಿ ಸೇರಿ ಹಲವು ಭಾಗಿ ಆಗಿದ್ರು.

ಅಮೂಲಾಗ್ರ ಬದಲಾವಣೆಗೆ ಪಟ್ಟು!

• ಪಂಜಾಬ್​​​ ಸೋಲಿನಲ್ಲಿ ಆದ ತಪ್ಪುಗಳನ್ನು ಗುರುತಿಸಬೇಕು
• ತಕ್ಷಣವೇ ಕಾಂಗ್ರೆಸ್ ಕಾರ್ಯಕಾರಿ ಸಮಿತಿ ಸಭೆ ಕರೆಯಬೇಕು
• ಎಐಸಿಸಿಗೆ ಶೀಘ್ರವೇ ಪೂರ್ಣಾವಧಿ ಅಧ್ಯಕ್ಷರನ್ನ ನೇಮಿಸಬೇಕು
• ಹೊಸ ನಾಯಕತ್ವಕ್ಕೆ ಅವಕಾಶ ನೀಡುವ ಸಮಯ ಇದಾಗಿದೆ
• ಕಾಂಗ್ರೆಸ್​​​ ಪಕ್ಷದ ನಾಯಕರಲ್ಲಿ ಸಮನ್ವಯತೆ ಕಾಪಾಡುವುದು
• ಪಕ್ಷದ ಕಾರ್ಯಗಳಿಗೆ 24×7 ಸಮಯವನ್ನ ಮೀಸಲಿಡಬೇಕು
• ಸೋಲಿನ ಆತ್ಮವಿಮರ್ಶೆಗೆ ಶೀಘ್ರವೇ ಸೋನಿಯಾ ಮೀಟಿಂಗ್​

ಪಂಚರಾಜ್ಯ ಚುನಾವಣೆಯ ಅನಿರೀಕ್ಷಿತ ಸೋಲಿನ ಕುರಿತು ಚರ್ಚಿಸಲು ಕಾಂಗ್ರೆಸ್‌ ಅಧ್ಯಕ್ಷೆ ಸೋನಿಯಾ ಗಾಂಧಿ ಮುಂದಿನ ವಾರ ಪಕ್ಷದ ಕಾರ್ಯಕಾರಿ ಸಮಿತಿ ಸಭೆ ಕರೆಯಲಿದ್ದಾರೆ. ಪಕ್ಷ ಎಲ್ಲಿ ಎಡವಿದೆ ಅನ್ನೋ ಬಗ್ಗೆ ಗಂಭೀರ ಚರ್ಚೆ ನಡೆಯುವ ಸಾಧ್ಯತೆ ಇದೆ.