ನವೆಂಬರ್​ನಲ್ಲಿ ವಿದೇಶಿ ನೆಲದಲ್ಲಿ ಐಪಿಎಲ್​ ಹರಾಜು ಪ್ರಕ್ರಿಯೆ ನಡೆಸಲು ಬಿಸಿಸಿಐ ಯೋಜನೆ?

ಈ ಸಲವೂ ಮಧ್ಯಪ್ರಾಚ್ಯ ದೇಶದಲ್ಲೇ ಹರಾಜು ನಡೆಸಲು ಬಿಸಿಸಿಐ ಮುಂದಾಗಿದೆ. ಗಲ್ಫ್​ ನಗರಗಳಾದ ದೋಹಾ, ಮಸ್ಕತ್​ ಅಥವಾ ಅಬುಧಾಬಿಯಲ್ಲಿ ನಡೆಸುವ ಸಾಧ್ಯತೆ ಹೆಚ್ಚಿದೆ. ಜತೆಗೆ ಸೌದಿ ಅರೇಬಿಯಾ ಕೂಡ ರೇಸ್​ನಲ್ಲಿದೆ. ಸೌದಿ ಇತ್ತೀಚೆಗೆ ಕ್ರೀಡೆಯಲ್ಲಿ ಹೆಚ್ಚಿನ ಹೂಡಿಕೆ ಮಾಡುತ್ತಿದ್ದು, ಐಪಿಎಲ್​ ಹರಾಜಿನ ಆತಿಥ್ಯಕ್ಕೂ ಆಸಕ್ತಿ ತೋರಿದೆ. ಆದರೆ ಸದ್ಯಕ್ಕೆ ಬಿಸಿಸಿಐ ಯಾವ ನಗರವನ್ನೂ ಅಂತಿಮಗೊಳಿಸಿಲ್ಲ.

ಹಾಲಿ ಮಾಸಾಂತ್ಯದೊಳಗೆ ಆಟಗಾರರ ರಿಟೇನ್​ ನಿಯಮಾವಳಿಯನ್ನು ಬಿಸಿಸಿಐ ಪ್ರಕಟಿಸಲಿದೆ. ಇದರಿಂದ ಎಲ್ಲ ತಂಡಗಳಿಗೆ ಮೆಗಾ ಹರಾಜಿಗೆ ಸಿದ್ಧತೆ ನಡೆಸಲು ಸುಮಾರು ಎರಡು ತಿಂಗಳ ಕಾಲಾವಕಾಶ ಲಭಿಸಲಿದೆ. ರಿಟೇನ್​ ಪಟ್ಟಿ ಅಂತಿಮಗೊಳಿಸಲು ತಂಡಗಳಿಗೆ ಬಿಸಿಸಿಐ ನವೆಂಬರ್​ 15ರವರೆಗೆ ಸಮಯ ನೀಡುವ ನಿರೀಕ್ಷೆ ಇದೆ.

ಬಿಸಿಸಿಐ ಕಾರ್ಯದರ್ಶಿ ಜಯ್​ ಷಾ ಡಿಸೆಂಬರ್​ 1ರಂದು ಐಸಿಸಿಯ ಹೊಸ ಚೇರ್ಮನ್​ ಆಗಿ ಅಧಿಕಾರ ಸ್ವೀಕರಿಸಲಿದ್ದಾರೆ. ಹೀಗಾಗಿ ಅದಕ್ಕೆ ಮುನ್ನ ನವೆಂಬರ್​ನಲ್ಲೇ ಆಟಗಾರರ ಹರಾಜು ಪ್ರಕ್ರಿಯೆ ಮುಗಿಸುವುದು ಬಿಸಿಸಿಐ ಯೋಜನೆಯಾಗಿದೆ. ಈ ಬಾರಿ ಮೆಗಾ ಹರಾಜು ನಡೆಯಲಿರುವುದರಿಂದ 2 ದಿನಗಳ ಕಾಲ ಪ್ರಕ್ರಿಯೆ ಸಾಗಲಿವೆ.