ದೊಡ್ಡ ಮಟ್ಟದಲ್ಲಿ ಅನಾವರಣಗೊಳ್ಳಲಿದೆ ಬಹುನಿರೀಕ್ಷಿತ ‘ಜವಾನ್’​ ಟ್ರೇಲರ್

ಟ್ರೇಲರ್​ ಬಿಡುಗಡೆ ಎಲ್ಲಿ? ಯಾವಾಗ?: ‘ಜವಾನ್​’ ಸಿನಿಮಾದ ಟ್ರೇಲರ್​ಗಾಗಿ ಇಡೀ ವಿಶ್ವವೇ ಕಾಯುತ್ತಿದೆ. ಚಿತ್ರದ ನಿರ್ಮಾಪಕರು ಟ್ರೇಲರ್​ ಅನ್ನು ಆಗಸ್ಟ್​ 31ರಂದು ರಾತ್ರಿ 9 ಗಂಟೆಗೆ ವಿಶ್ವದ ಅತಿ ಎತ್ತರದ ಕಟ್ಟಡವಾದ ದುಬೈನ ಬುರ್ಜ್​ ಖಲೀಫಾದ ಮೇಲೆ ಪ್ರದರ್ಶಿಸಲು ಯೋಜಿಸಿದ್ದಾರೆ. ಈ ವಿಚಾರವನ್ನು ಸ್ವತಃ ಶಾರುಖ್​ ಖಾನ್​ ಎಕ್ಸ್​ (ಹಿಂದಿನ ಟ್ವಿಟರ್​) ನಲ್ಲಿ ತಿಳಿಸಿದ್ದಾರೆ. “ನಿಮ್ಮೊಂದಿಗೆ ಜವಾನ್​ ಆಚರಿಸಲು ನಾನು ಆಗಸ್ಟ್​ 31 ರಂದು ರಾತ್ರಿ 9 ಗಂಟೆಗೆ ಬುರ್ಜ್​ ಖಲೀಫಾಗೆ ಬರುತ್ತಿದ್ದೇನೆ. ಪ್ರೀತಿಯು ಪ್ರಪಂಚದ ಅತ್ಯಂತ ಸುಂದರವಾದ ಭಾವನೆ.. ಆ ಪ್ರೀತಿಯಲ್ಲಿ ಮುಳುಗೋಣ” ಎಂದು ಎಕ್ಸ್​ನಲ್ಲಿ ಬರೆದುಕೊಂಡಿದ್ದಾರೆ.

ದುಬೈನ ಪ್ರಸಿದ್ಧ ಬುರ್ಜ್​ ಖಲೀಫಾ ಕಟ್ಟಡದಲ್ಲಿ ಶಾರುಖ್​ ಖಾನ್​ ಸಿನಿಮಾದ ಟ್ರೇಲರ್​ ಪ್ರದರ್ಶಿಸುತ್ತಿರುವುದು ಇದೇ ಮೊದಲಲ್ಲ. ಈ ವರ್ಷದ ಆರಂಭದಲ್ಲಿ ತೆರೆಕಂಡ ಪಠಾಣ್​ ಸಿನಿಮಾದ ಟ್ರೇಲರ್​ ಅಲ್ಲೇ ಪ್ರದರ್ಶನಗೊಂಡಿತ್ತು. ಆದರೆ, ಟ್ರೇಲರ್ ಬಿಡುಗಡೆಯಾದ ನಾಲ್ಕು ದಿನಗಳ ನಂತರ ಸಮಾರಂಭವನ್ನು ನಡೆಸಲಾಯಿತು. ಇದೀಗ ಪ್ರಸ್ತುತ ಜವಾನ್​ ಚಿತ್ರದ ಟ್ರೇಲರ್​ ನೇರವಾಗಿ ಬುರ್ಜ್​ ಖಲೀಫಾದಲ್ಲಿ ಬಿಡುಗಡೆಯಾಗಲಿದೆ. ಗಲ್ಲಾಪೆಟ್ಟಿಗೆಯಲ್ಲಿ ಅದ್ಭುತ ಯಶಸ್ಸನ್ನು ಕಂಡ ಪಠಾಣ್​ ಚಿತ್ರವನ್ನು ಜವಾನ್​ ಮೀರಿಸುವ ನಿರೀಕ್ಷೆ ಚಿತ್ರತಂಡಕ್ಕಿದೆ. ​

ಮುಂಗಡ ಟಿಕೆಟ್​ ಬುಕ್ಕಿಂಗ್​ಗೆ ಭರ್ಜರಿ ರೆಸ್ಪಾನ್ಸ್​: ಜವಾನ್​ ಮುಂಗಡ ಟಿಕೆಟ್​ ಬುಕಿಂಗ್​ ಪ್ರಕ್ರಿಯೆ ಈಗಾಗಲೇ ಆರಂಭಗೊಂಡಿದೆ. ಅಭಿಮಾನಿಗಳು ಸಿನಿಮಾ ಕುರಿತು ತಮ್ಮ ಉತ್ಸಾಹ ವ್ಯಕ್ತಪಡಿಸುತ್ತಿದ್ದಾರೆ. ಎಸ್​ಆರ್​ಕೆ ಮುಖ್ಯಭೂಮಿಕೆಯ ಸಿನಿಮಾ ಮುಂಗಡ ಟಿಕೆಟ್‌ಗಳು ಭಾರೀ ವೇಗದಲ್ಲಿ ಮಾರಾಟವಾಗುತ್ತಿದೆ. ಇದು ನಟನ ಜನಪ್ರಿಯತೆಯನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ. ಸಿನಿಮಾ ತೆರೆಕಾಣುವ ಮೊದಲ ದಿನದ ಟಿಕೆಟ್‌ಗಳು (ಹಲವು ಚಿತ್ರಮಂದಿರಗಳ ಟಿಕೆಟ್​ಗಳು) ಕೇವಲ 15 ನಿಮಿಷಗಳಲ್ಲಿ ಸಂಪೂರ್ಣವಾಗಿ ಸೋಲ್ಡ್ ಔಟ್ ಆಗಿವೆ.

ಜವಾನ್‌ ಹಿಂದಿ, ತಮಿಳು ಮತ್ತು ತೆಲುಗು ಭಾಷೆಗಳಲ್ಲಿ ಸೆಪ್ಟೆಂಬರ್ 7 ರಂದು ವಿಶ್ವದಾದ್ಯಂತ ಬಿಡುಗಡೆ ಆಗಲಿದೆ. ಎಸ್‌ಆರ್‌ಕೆ ಮುಖ್ಯಭೂಮಿಕೆಯ ಸಿನಿಮಾದಲ್ಲಿ ವಿಜಯ್ ಸೇತುಪತಿ, ನಯನತಾರಾ, ಸಾನ್ಯಾ ಮಲ್ಹೋತ್ರಾ ಮತ್ತು ಪ್ರಿಯಾಮಣಿ ಕೂಡ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಇತ್ತೀಚಿನ ಬ್ಲಾಕ್​ ಬಸ್ಟರ್ ಸಿನಿಮಾ ಪಠಾಣ್​ನಲ್ಲಿ ಎಸ್​ಆರ್​ಕೆ ಜೊತೆ ನಾಯಕ ನಟಿಯಾಗಿ ಸ್ಕ್ರೀನ್​ ಶೇರ್ ಮಾಡಿರುವ ದೀಪಿಕಾ ಪಡುಕೋಣೆ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.