ಬಿಸಿಲ್ಗುದುರೆಯಂತೆ ಮಿನುಗಿ ಹೋಗುವ ಕಾಲದಂತೆ ಕರಗಿಹೋಗುವ ನೆನಪೇ ಒಂದು ಚಲಿಸುವ ಗಡಿಯಾರ

ಚಲಿಸುವ ಗಡಿಯಾರ

ಬಿಸಿಲ್ಗುದುರೆಯಂತೆ ಮಿನುಗಿ ಹೋಗುವ
ಕಾಲದಂತೆ ಕರಗಿಹೋಗುವ
ನೆನಪೇ ಒಂದು ಚಲಿಸುವ ಗಡಿಯಾರ

ಹಗಲಲಿ ಕನಸ ನಕ್ಷತ್ರಗಳು ಮರೆಯಾಗುವಂತೆ
ಮಾಯವಾಗುವ
ನೆನಪೇ ಒಂದು ಚಲಿಸುವ ಗಡಿಯಾರ

ಕತ್ತಲೆ ಬೆಳಕನಾವರಿಸುವಂತೆ
ಮನವನಾವರಿಸುವ
ನೆನಪೇ ಒಂದು ಚಲಿಸುವ ಗಡಿಯಾರ….

ನವಿರಾದ ಸುಖಗಳ ನಡುವೆ
ಸಿಹಿಯಾದ ಅನುಭವ ಬೆರೆಸುವ
ನೆನಪೇ ಒಂದು ಚಲಿಸುವ ಗಡಿಯಾರ

ಭವಿಷ್ಯದ ಗರ್ಭದಲಿ ಗರಿಬಿಚ್ಚಿ ನಲಿವಂತೆ
ಸಿಹಿನೆನಪಿನ ತರಂಗಗಳನ್ನು ಬಡಿದೆಬ್ಬಿಸುವ
ನೆನಪೇ ಒಂದು ಚಲಿಸುವ ಗಡಿಯಾರ

ಹೃದಯದ ಭಾವನೆಗಳನ್ನು ಕೆಣಕುತಾ
ಪ್ರೀತಿ ಬೀಜಬಿತ್ತಿ ಸಹಬಾಳ್ವೆ ಬಯಸುವ
ನೆನಪೇ ಒಂದು ಚಲಿಸುವ ಗಡಿಯಾರ